Që nga paraqitja e rasteve të para të sëmundjes Covid-19 në botë, të gjithë pyesin nëse virusi mund të kthehet tek personat e shëruar. Profesor, Lul Raka, përmes rrjetit të tij social në Facebook shpjegon këtë dukuri.
Sipas tij dhe studimeve të kryera në Korenë e Jugut, fragmenteve të qelizave u duhen muaj për t’u pastruar nga trupi. Prandaj, testet PCR nuk mund të dallojnë nëse virusi është i gjallë apo i vdekur dhe kjo mund të çojë në rezultate pozitive të rrejshme, transmeton Gazeta Shneta.
Pra, sëmundja nuk kthehet tek pacientët e shëruar.
Postimi i plotë:
A MUND TË PREKET PËRSËRI NGA COVID-19 NJË PACIENT I SHËRUAR?
Kjo pyetje u shtrua në mbarë botën ditëve të fundit, pas raportimit të disa rasteve të pacientëve në Korenë e Jugut.
Ekspertët e infektologjisë në Korenë e Jugut deklaruan pardje se fragmentet e virusit të vdekur shkaktuan që 292 persona të shëruar, të jenë përsëri pozitiv disa javë pas shërimit.
“Testet zbuluan acidin ribonukleik të virusit të vdekur,” tha Oh Myoung-don, udhëheqës i panelit të ekspertëve. Ai theksoi se tek testet PCR, që përdoren për diagnozën e COVID-19, materialet gjenetike të virusit amplifikohen gjatë testimit, qoftë nga një virus i gjallë apo thjesht nga fragmente të qelizave të vdekura të virusit. Këtyre fragmenteve nganjëherë ju duhen muaj për t’u pastruar nga pacientët e rikuperuar.
Testet PCR nuk mund të dallojnë nëse virusi është i gjallë apo i vdekur, dhe kjo mund të çojë në rezultat të rrejshëm pozitiv.
Fragmentet e vdekura të virusit nuk janë infektive. Këta pacientë nuk e përhapin infeksionin!
PRA, SËMUNDJA NUK RIKTHEHET TE PACIENTI I SHËRUAR!