Brazili është shtëpia e disa prej njerëzve më jetëgjatë në botë, përfshirë tre nga dhjetë burrat më të moshuar që kanë jetuar mbi 110 vjet. Një studim i ri shkencor hedh dritë mbi arsyet pse ky vend ka një numër kaq të lartë individësh që arrijnë moshë shumë të avancuar, shpesh në gjendje të mirë shëndetësore.
Në një artikull të botuar në revistën “Genomic Press”, studiuesit sugjerojnë se faktorë të veçantë gjenetikë dhe imunologjikë mund të luajnë rol kyç në këtë fenomen. Ndryshe nga tendencat moderne që promovojnë jetëgjatësinë përmes trajtimeve të shtrenjta, suplementeve dhe “bio-hack”-eve, shumë brazilianë jetojnë mbi 100 vjet pa pasur akses në kujdes shëndetësor të avancuar apo klinika luksoze, shkruan Euronews Health transmeton Gazeta Shneta.
Shkencëtarët theksojnë se qëllimi global nuk është thjesht të jetosh më gjatë, por të kesh një jetë të shëndetshme për më shumë vite. Personat që arrijnë moshë të shtyer pa sëmundje serioze, si demenca, sëmundjet e zemrës apo kanceri, përfaqësojnë një burim të çmuar studimi për mjekësinë.
Sipas studimit, një nga mekanizmat kryesorë lidhet me mirëmbajtjen e proteinave. Tek superqindvjeçarët, trupi arrin të eliminojë proteinat e dëmtuara po aq mirë sa tek individët shumë më të rinj.
Një faktor tjetër është sistemi imunitar, i cili në vend që të dobësohet me moshën, përshtatet dhe bëhet më rezistent ndaj infeksioneve dhe inflamacionit kronik.
Së fundi, studiuesit theksojnë rolin e “gjenetikës së favorshme”. Disa individë mbartin variante të rralla gjenesh që mbështesin stabilitetin gjenomik, funksionin e mitokondrive dhe një mbrojtje më të fortë imunitare.
Studimi i këtyre njerëzve mund të ndihmojë shkencën të kuptojë më mirë plakjen dhe të zhvillojë strategji për një jetë më të gjatë dhe më të shëndetshme për të gjithë. /Gazeta Shneta/