Mbi 10 mijë vaksina kundër gripit sezonal janë aplikuar në Prishtinë që nga 1 tetori, ka bërë të ditur drejtori i Qendrës Kryesore të Mjekësisë Familjare, Dr. Valdet Hashani.
Sipas Dr. Hashanit, deri më tani janë administruar 10 mijë e 380 vaksina, kryesisht te personat mbi moshën 65-vjeçare, personat me gjendje të caktuara shëndetësore, punëtorët shëndetësorë dhe kategoritë e tjera të rrezikuara.
Nga totali i vaksinave të aplikuara:
7316 janë te personat mbi 65 vjeç
2875 te personat nën 65 vjeç me gjendje shëndetësore të caktuara
183 te punëtorët shëndetësorë
3 te gratë shtatzëna
3 te fëmijët nga 6 muaj deri në 5 vjeç
Drejtori i QKMF-së ka rikujtuar se fushata e vaksinimit sezonal ka nisur më 1 tetor, duke theksuar rëndësinë e vaksinimit si mënyra më efektive e parandalimit të gripit sezonal.
‘’Fillimisht qytetarët do të duhej të ishin vaksinuar, meqë vaksinimi sezonal sivjet ka filluar me 1 tetor, por të gjithë ata që nuk e kanë bërë një gjë të tillë, tani duhet të kujdesen për veten e tyre dhe familjarët e pa vaksinuar edhe në rrethana shtëpie, meqë marrja e një Paracetamoli, Ibuprof4ni apo diklofeni, apo te ngjashëm për të ulur temperaturën trupore apo dhembjet eventuale te kokës, trurit bëjnë efektin e mjaftueshëm. Marrja e vitaminës C, D, Mg e mineralet tjera’’, ka thënë Dr. Hashani për Front Online.
Ai ka rekomanduar që qytetarët që nuk janë vaksinuar të tregojnë kujdes të shtuar, duke përfshirë përdorimin e terapisë bazike për uljen e temperaturës dhe dhimbjeve, marrjen e vitaminave dhe mineraleve, si dhe respektimin e masave higjieno-sanitare.
‘’Lani duart rregullisht me sapunë, sidomos pas teshtitjes dhe kollitjes, kështu pengoni infektimin e anëtarëve tjerë të familjes apo ata që vini në kontakt, ajrosini shpesh dhomat ku qëndroni, mos i prekni hundët, grykën , dezinfektoni tavolinën, dorezën e derës, teledirigjuesit dhe çdo gjë që prekni. Merrni ushqime të shëndetshme, flini mjaftueshëm dhe pushoni më gjatë se zakonisht, aktivitetet të jenë shumë të lehta’’, u shpreh ai.
Sipas Dr. Hashanit, gjendjet virale zakonisht zgjasin tre deri në katër ditë, por mund të zgjasin më shumë te personat me imunitet të dobësuar ose te ata që nuk pushojnë mjaftueshëm.
‘’Gjendjet virale apo gripet sezonale zgjasin, varësisht nga individët, nga 3-4 ditë por mund të zgjasin edhe më shumë te personat me imuniste të dobësuar, ata që nuk pushojnë mjaftueshëm, dhe nuk kujdesen për simptomat’’. theksoi Dr. Hashani.