Qendra Klinike Universitare e Kosovës (QKUK) e ka rekomanduar për kontratë kompaninë nga Prizreni MBB Construction, me ofertë në vlerë prej 706,922.60 euro, pavarësisht se në këtë tender kishte oferta dukshëm më të lira, raporton Front Online.
Sipas dokumenteve të siguruara, në garë për projektin e renovimit të Hemodializës kanë qenë edhe disa operatorë ekonomikë që kanë ofruar çmime më të ulëta se kompania fituese.
Kompania Olti Trasing kishte ofertuar me vetëm 646,577.55 euro, që është mbi 60 mijë euro më lirë se oferta fituese.
Kompania tjetër Nika Pro Ing kishte aplikuar me 649,664.95 euro
Po ashtu, kompania Termomontimi kishte ofertuar me 699,996.56 euro, ndërsa Limit Project me 702,080.70 euro, të gjitha më të ulëta se oferta e përzgjedhur raporton Front Online.
Pavarësisht kësaj diference të konsiderueshme financiare, QKUK ka vendosur që kontratën t’ia japë operatorit me çmimin më të lartë, duke ngritur dyshime për kriteret e përdorura në këtë proces dhe për transparencën e vendimmarrjes.
Limit Project ankohet në OSHP
Kompania LIMITPROJECT SH.P.K. ka paraqitur ankesë lidhur me procesin e prokurimit për renovimin e Hemodializës në Qendrën Klinike Universitare të Kosovës (QKUK), duke kundërshtuar vendimin për shpalljen e fituesit.
Në ankesën e dorëzuar, kompania thekson se aktiviteti i prokurimit është zhvilluar me kriter të dhënies së kontratës “çmimi më i ulët”, ndërsa sipas saj ky kriter nuk është respektuar gjatë vendimmarrjes .
Sipas pretendimeve të paraqitura, autoriteti kontraktues ka shpallur fitues operatorin ekonomik MBB Construction SH.P.K., me ofertë në vlerë prej 706,922.60 euro, ndërkohë që në garë kanë qenë edhe operatorë të tjerë me oferta më të ulëta, raporton Front Online.
LIMITPROJECT SH.P.K. pretendon se pas qasjes në dokumentacionin zyrtar të tenderit, janë identifikuar mangësi në dokumentet e operatorit të rekomanduar për kontratë, të cilat, sipas tyre, lidhen me përmbushjen e kërkesave të dosjes së tenderit.
Në ankesë theksohet se eliminimi i ofertës së kësaj kompanie është bërë mbi bazë të interpretimit të kërkesave për angazhimin e inxhinierit të mjedisit.
Sipas tyre, dokumentacioni i dorëzuar ka përfshirë ndarjen e përgjegjësive ndërmjet disa inxhinierëve, ku njëri ka qenë përgjegjës për fushën e mjedisit, ndërsa të tjerët për sigurinë dhe shëndetin në punë, të pajisur me certifikata përkatëse nga institucionet relevante .
Tutje, kompania pretendon se këto dokumente dëshmojnë përmbushjen e kërkesave teknike dhe profesionale të përcaktuara në dosjen e tenderit, duke e konsideruar eliminimin e ofertës si të padrejtë, raporton Front Online.
Në ankesë po ashtu përmendet se vendimi i autoritetit kontraktues bie ndesh me dispozitat e Ligjit për Prokurimin Publik, përfshirë parimet e trajtimit të barabartë, transparencës dhe konkurrencës së drejtë.
LIMITPROJECT SH.P.K. kërkon rishqyrtimin e vendimit për eliminimin e ofertës së saj dhe rivlerësimin e procesit të prokurimit në përputhje me kriteret dhe kërkesat e përcaktuara në dokumentacionin e tenderit, raporton Front Online.