Qendra Klinike Universitare e Kosovës (QKUK) ka reaguar pas raportimeve lidhur me furnizimin me oksigjen medicinal, duke bërë të ditur se furnizimi po zhvillohet rregullisht dhe pa ndërprerje.
Sipas njoftimit të QKUK-së, gjatë gjithë kësaj periudhe nuk ka pasur mungesë të oksigjenit dhe, siç thuhet, në asnjë moment nuk është rrezikuar trajtimi apo ofrimi i shërbimeve për pacientët.
QKUK thekson se pretendimet e publikuara nuk pasqyrojnë gjendjen reale dhe nuk janë verifikuar përmes Zyrës për Media të QKUK-së.
Në njoftim bëhet e ditur gjithashtu se procedurat për lidhjen e kontratës së re për furnizim me oksigjen medicinal janë duke vazhduar./Gazeta Shneta/