Dimrin e kaluar, Toskana u përball me një shpërthim të madh të kollës së mirë (pertusis), që preku qindra fëmijë, pavarësisht se rajoni ka një nga normat më të larta të vaksinimit në Itali.
Sipas burimit Euronews Health, shtrimet në spital për fëmijët u rritën nëntëfish në vitin 2024, duke e kthyer pertusisin në një problem serioz shëndetësor.
Sipas një studimi të publikuar nga Qendra Evropiane për Parandalimin dhe Kontrollin e Sëmundjeve (ECDC), shumica e fëmijëve dhe adoleshentëve të prekur kishin marrë vaksinat, por vonesat në marrjen e dozave dhe sidomos të përforcuesve (booster) bënë që imuniteti të zbehej, duke lejuar bakterin të përhapej.
Autorët theksuan se edhe tek fëmijët “me vaksina në rregull”, një administrim më i hershëm mund të kishte shmangur shtrimet.
Në Itali rekomandohen katër doza në fëmijëri (në 3, 5, 11 muaj dhe në moshën 6 vjeç), si dhe përforcues midis moshës 12-18 vjeç e më pas çdo 10 vjet. Në rastet e studiuara, vonesat arrinin mbi një muaj për foshnjat dhe mbi një vit për adoleshentët.
Ndërkohë, nga 2016 deri 2019, mesatarisht 28 fëmijë në vit shtroheshin në spital për pertusis, ndërsa në 2024 numri u rrit në 259 – shumica adoleshentë 10-16 vjeç, ndërsa foshnjat përbënin vetëm 7%.
Studiuesit sugjeruan që intervali i gjerë për dozën përforcuese të adoleshentëve (12-18 vjeç) mund të jetë një “mundësi e humbur” për mbrojtje. /Gazeta Shneta/