Studimet tregojnë se gratë që bëhen nëna për herë të parë pas moshës 30 vjeç kanë 40-45% më shumë gjasa të preken nga kanceri i gjirit. Ky lloj kanceri, i quajtur kanceri i gjirit pas lindjes (postpartum), shfaqet zakonisht tek gratë nën 45 vjeç në vitet e para pas shtatzënisë dhe është më agresiv se format e tjera të sëmundjes.
Sipas burimit Euronews Health, zbulimi i hershëm dhe trajtimi i specializuar janë thelbësor për mbijetesën.
Në nivel global, në vitin 2022 u diagnostikuan 2.3 milionë gra me kancer gjiri dhe 670 mijë humbën jetën, sipas Organizatës Botërore të Shëndetësisë.
Në BE, rreth 3.9% e vdekjeve nga kanceri i gjirit ndodhin tek gratë nën 45 vjeç, megjithëse shumica e rasteve shfaqen pas kësaj moshe, transmeton Gazeta Shneta.
Simptomat më të zakonshme përfshijnë një gungë në gji, ndryshime në formë ose në lëkurë, rrjedhje nga thithka ose dhimbje të vazhdueshme, por në fazat e hershme shpesh mungojnë shenjat.
Sipas profesor Weston Porter nga Universiteti Texas A&M, shtatzënia e parë në të 30-at ndikon tek qelizat imunitare gjatë periudhës së gjidhënies dhe procesit të ndërprerjes së saj (involucionit), duke shkaktuar një rritje të inflamacionit që lidhet me zhvillimin e kancerit.
Megjithatë, studime të tjera tregojnë se shtatzënia dhe lindja mund të ulin rrezikun e kancerit të gjirit në periudha afatgjata, sidomos tek gratë më të moshuara.
Gjithashtu, numri i fëmijëve dhe gjidhënia luajnë rol mbrojtës. Një analizë e vitit 2020 mbi 50,000 gra tregoi se çdo vit shtesë i gjidhënies mund të ulë rrezikun me më shumë se 50%.
Ekspertët këshillojnë që nënat e reja mbi 30 vjeç të jenë më vigjilente, të kryejnë mamografi të rregullta dhe vetëkontrolle për të zbuluar çdo ndryshim të dyshimtë. /Gazeta Shneta/