Konkursi i fundit për specializime nga Ministria e Shëndetësisë ka qenë në nëntor të vitit 2016, kohë kjo kur shëndetësia është udhëhequr nga ish-ministri Imet Rrahmani.
Por tani kanë kaluar afër katër vjet dhe në detyrë ka ardhur ministri i dytë që nga koha e Rrahmanit dhe konkursi ende nuk është shpallur dhe as që pritet të bëhet një gjë e tillë, shkruan Gazeta Shneta.
Ministria e Shëndetësisë nën udhëheqjen e ish-ministrit Uran Ismaili nuk ka kthyer përgjigje për këtë çështje në pyetjet e dërguara para 2 javësh. Pozitën e ministrit Ismaili ia ka dorëzuar ditën e djeshme Dr. Arben Vitisë nga Lëvizja Vetëvendosje, pas formimit të Qeverisë Kurti.
Kryetari i Odës së Mjekëve të Kosovës Dr. Pleurat Sejdiu thotë se konkursi i specializimeve ka qenë i paraparë të hapet në fundvitin e kaluar nga ana e MSh-së. Sejdiu ka treguar se kanë pasur takim me grupin punues për Udhëzimin e ri Administrativ para se të vendoset për formën përfundimtare. Ai ka pranuar se ka qëndrime të kundërta në lidhje me këtë UA.
“Ka qëndrime të kundërta në interpretimin e kompetencave të Ligjit për Shëndetësi”, ka deklaruar Sejdiu.
Ai ka thënë se ka nevojë të madhe dhe kërkesa për specializime, por profilet e tyre duhet t’i dijë MSH, por një prej tyre është anesteziologjia. Sejdiu ka thënë se nuk ka të dhëna të sakta sesa mjekë e kanë lëshuar Kosovën, por gjatë vitit 2019 në OMK 109 mjekë kanë kërkuar vërtetim të pastërtisë etiko-profesionale e cila nevojitet për punë në vendet e huaja.
Në mungesë të konkursit për specializime vitin e kaluar në Spitalin e Gjakovës është mbyllur shërbimi i oftalmologjisë pasi oftalmologu i vetëm kishte dal në pension. Ndërkaq në mungesë të anesteziolgoëve të rinj në Spitalin e Ferizajt nuk mund të hapen shërbime të reja dhe të rritet numri i operacioneve.
“Nëse do të kishim më shumë anesteziologë do të mund të rrisnim numrin e operacioneve dhe të hapnim shërbime të reja. Poashtu kemi nevojë imediate për specialistë të emergjencës dhe neonatolog”, ka deklaruar drejtori i SP Ferizaj Dr. Jeton Zeqiri. /Gazeta Shneta/