Placenta është një organ i cili formohet nga po të njëjtat qeliza që formohet edhe embrioni, dhe kryen disa funksione të rëndësishme. Bën rregullime të rëndësishme metabolike mes trupit të nënës dhe të fetusit dhe minimizon distancën mes gjakut të oksigjenuar të nënës dhe atë të fetusit.
Por përtej këtyre funksioneve shumë pak gjëra dihen për placentën, e cila është ende një organ misterioz edhe për ekspertët.
Por ,së fundmi, një studim i ri ka bërë një zbulim i cili e lidh placentën me zhvillimin e sëmundjeve të sistemit nervor si skizofrenia.
Studiuesit nga “Lieber Institute for Brain Development” në Baltimore zbuluan se të njëjtat gjene të lidhura me skizofreninë shoqërojnë edhe komplikacionet në shtatzani. Studiuesit vunë re se aktivizimi i këtyre gjeneve influencon shëndetin e placentës në shtatzani duke shkaktuar kështu komplikacione gjatë saj.
“Për herë të parë ne arritëm të zbulonim një lidhje mes ndryshimeve gjenetike në placentë dhe rrezikut për prekjen nga sëmundjet nervore”, tha Daniel R. Weinberg, autori kryesor i studimit dhe njëkohësisht drejtor i përgjithshëm i “Lieber Institute”. Studiuesit e kanë ditur me kohë se ndryshimet gjenetike luajnë një rol të rëndësishëm në zhvillimin e sëmundjeve mendore, por nuk e dinin se cila ishte periudha më e hershme që këto ndryshime gjenetike mund të ndodhnin.
Pas këtij zbulimi ata mund të punojnë për të gjetur trajtime apo strategji për të përmirësuar shëndetin e placentave të dobëta, në menyrë që të parandalojnë këto çrregullime mendore në të cilat përfshihet dhe autizmi./pernenat.al/