Autoritetet shëndetësore në Mbretëria e Bashkuar janë duke hetuar një shpërthim të Meningjiti B në juglindje të vendit, ku deri më tani janë raportuar 20 raste të konfirmuara ose të dyshuara, përfshirë dy viktima të reja në qytetin universitar Canterbury.
Sipas autoriteteve, 11 raste të tjera janë ende në proces konfirmimi, ndërsa situata po monitorohet nga UK Health Security Agency. Sekretari i Shëndetësisë, Wes Streeting, ka deklaruar se rreziku për publikun mbetet i ulët, megjithëse sëmundja konsiderohet shumë serioze.
Meningjiti është një infeksion që prek membranat që rrethojnë trurin dhe palcën kurrizore, ndërsa forma bakteriale, si meningjiti B, është më e rëndë se ajo virale.
Sëmundja përhapet përmes kontaktit të afërt, si kollitja, puthja apo ndarja e enëve.
Simptomat kryesore përfshijnë temperaturë të lartë, dridhje, dhimbje në qafë, ndjenjë të përzier dhe një skuqje karakteristike në lëkurë që nuk zhduket kur shtypet.
Ekspertët theksojnë se identifikimi i saktë i llojit të bakterit kërkon analiza laboratorike.
Shpërthimi dyshohet të ketë lidhje me një klub nate lokal në Canterbury, ndërsa një punonjës i tij mendohet të ketë qenë një nga rastet fillestare. Një nga viktimat ishte një nxënës nga zona e Faversham.
Për të frenuar përhapjen, autoritetet kanë nisur shpërndarjen e antibiotikëve dhe kanë hapur katër qendra vaksinimi, me rreth 11 mijë doza në dispozicion. Studentëve po u ofrohet gjithashtu vaksina kundër meningjitit B.
Ekspertët theksojnë se vaksina është një mjet i rëndësishëm mbrojtës, por efekti i saj nuk është i menjëhershëm, pasi kërkon disa javë për të krijuar imunitet të plotë.
Ndërkohë, një kurë e vetme me antibiotikë mund të ndihmojë në parandalimin e infeksionit në rreth 90 për qind të rasteve./Gazeta Shneta/