Shërbimi Spitalor Klinik Universitar ka deklaruar se i vije keq për pacientët që janë detyruar të blejnë barna. Kjo deklaratë është dhënë në lidhje me pyetjet e Gazetës për mungesën e barnave në intensiven e QKUK-së
Gazeta ka raportuar javën e kaluar për një listë të gjatë të barnave dhe materialeve që mungojnë në Mjekimin Intensiv Qendror. Një familjar ishte detyruar të merrte kredi për të blerë barna për babanë e tij që ishte në koma qe pesë javë. A.Z. ka treguar kuponët fiskal dhe recetat e barnave që ka blerë e të cilat i kanë kushtuar rreth 1650 euro.
Për këto mungesa dhe për kredinë e familjarëve, menaxhmenti i SHSKUK-së deklaron se i vije keq. “SHSKUK, shpreh keqardhje që familjarët e pacientit janë detyruar të blejnë disa nga barnat e caktuara dhe në të njëjtën kohe siguron të gjithë qytetarët se janë ndërmarrë të gjitha masat e nevojshme për furnizim të qëndrueshëm me barna nga lista esenciale”, thuhet në sqarimin e SHSKUK-së për Gazetën Shneta.
Tutje në sqarim thuhet se kostoja mesatare e shpenzimeve vetëm për barna dhe materiale shpenzueses për një pacient që mjekohet në mjekimin intensiv qendrore dhe është i intubuar sillet nga 200 deri në 250 euro për 24 orë të mjekimit në këtë njësi.
“Për rastin të cilin është raportuar, shumica e barnave dhe mjekimi janë siguruar nga ana e institucionit, përderisa disa nga barnat me kosto me te larte të blera nuk janë në listë esenciale . Pacienti në fjalë është i shtrirë në kujdesin intensiv para 36 dite dhe është në ditën e 37 të mjekimit”, thuhet në përgjigjen e SHSKUK-së. /Gazeta Shneta/
Familja merr kredi mbi 1600 euro për të blerë barna për pacientin e shtrirë në intensivën e QKUK-së