Aksidentet ndodhin edhe në udhëtime të shkurtra, me shpejtësi të ulët, por edhe tek shoferët më të kujdesshëm. Gratë shtatzëna gjithmonë duhet ta vënë rripin e sigurimit.
Sot, jeta është shumë dinamike dhe një grua shtatzënë do të duhet të vazhdojë me aktivitetet e përditshme të cilat i ka kryer edhe përpara se të mbetet shtatzënë. Gati të gjitha punët është e pamundur të imagjinohen se mund të kryhen pa pasur nevojë që të udhëtohet me veturë.
Një grua shtatzënë mund të ngasë veturën pa problem, por duhet që të vendosë rripin e sigurisë. Fëmija në brendi të mitrës është e mbrojtur shumë mirë, por megjithatë mund të jetë me rrezik për beben dhe për shtatzënën nëse ndodhë ndonjë aksident komunikacioni.
Pa marrë parasysh se a është një aksident i vogël apo një përplasje më e madhe midis veturave dhe se a ka qenë shtatzëna duke ngarë veturën apo ka qenë në veturë, gjithmonë duhet të kërkohet ndihma e mjekut dhe atë sa më shpejt që të jetë e mundur.
Duhet të kërkohet ndihma mjekësore pa marrë parasysh se në cilën javë të shtatzënisë jeni, bile edhe nëse ndjeheni krejtësisht mirë dhe nuk keni asnjë problem.
Mitra është një mburojë shumë e mirë për beben. Fëmija në brendi të mitrës është e rrethuar me ujë që është një amortizator i goditjeve, por nëse ndodh aksidenti në komunikacion ekziston rreziku që placenta të shkolitet nga mitra. Kjo gjendje quhet abrupcion i placentës.
Nëse ndodhë abrupcioni mund të shkaktohet gjakderdhje (e cila nuk është e dukshme, pra gjaku nuk del jashtë) gjë që seriozisht rrezikon mirëqenien e fëmijës si dhe të shtatzënës. Problemi është se edhe nëse ndodhë abrupcioni një shtatzënë mund të mos ndjejë asnjë shqetësim. Për këtë arsye është mirë që të bëhet një kontroll tek mjeku.
Mjeku bën një ekzaminim të detajuar të gjendjes së shtatzënës dhe të frytit, përfshirë ekzaminimin me ultrazë për të parë gjendjen e fëmijës dhe të placentës. Mund të jetë e nevojshme që gjendja të përcillet për disa orë rresht.
Nëse shtatzëna është Rh negative, atëherë duhet të merret Rh imunoglobulina për shkak se ka mundësi që gjaku i shtatzënës ka rënë në kontakt me gjakun e bebes.
Nëse gjendja është stabile, atëherë mjeku ju lëshon në shtëpi me rekomandimin që të përcillni se mos do të keni gjakrrjedhje nga vagina, rrjedhje të lëngut nga mitra, nëse keni dhimbje barku ose nëse ju duket se bebja lëviz më pak se më parë.
Nëse do të keni ndonjë nga këto shenja duhet të kontaktoni menjëherë me mjekun tuaj.