Close Menu

Shtatzënia dhe presioni i lartë i gjakut

Këshilla për shtatzëna

Presioni i gjakut i referohet forcës së gjakut që shtyn kundër mureve të arterieve, ndërsa ato transportojnë gjakun nga zemra në pjesën tjetër të trupit tuaj.

Presioni i lartë, i quajtur hipertension, ndodh kur ajo forcë është më e lartë se normalja në shumicën e kohës. Hipertensioni rrit rrezikun e sëmundjeve të zemrës, sulmit në zemër ose goditjes në tru. Për gratë, presioni i lartë i gjakut në shtatzëni mund të rrisë rrezikun e komplikimeve si për nënën ashtu edhe për foshnjën. Një grua mund të ketë hipertension para se të mbetet shtatzënë ose ta zhvillojë atë gjatë shtatzënisë.

Më poshtë AgroWeb.org ju njeh me rastet kur kjo përbën rrezik dhe duhet të këshilloheni me mjekun tuaj.

Preeklampsia

Preeklampsia është një sëmundje e karakterizuar nga presioni i lartë i gjakut dhe sekretimi i proteinave në urinë. Gratë mund ta zhvillojnë atë gjatë shtatzënisë ose deri në gjashtë javë pas lindjes.

Rreziku i një gruaje për të zhvilluar preeklampsi mund të jetë më i lartë se mesatarja nëse ajo:

Kishte preeklampsi në një shtatzëni të mëparshme.

Nuk ka qenë shtatzënë më parë.

Është më e vjetër se 40 ose më e re se 18 vjeç.

Kishte presion të lartë të gjakut përpara se të mbetej shtatzënë.

Është obeze dhe/ose ka diabet.

Është shtatzënë me binjakë ose trenjakë.

Ekspertët e shëndetit thonë se dy shenjat kryesore të preeklampsisë janë presioni i lartë i gjakut dhe nivelet jonormale të larta të proteinave në urinën e nënës.

Simptomat përfshijnë:

Ënjtje në duar ose fytyrë.

Shtim i shpejtë në peshë brenda pak ditësh.

Dhimbje koke të moderuara deri në të forta.

Dhimbje në pjesën e sipërme të djathtë të barkut.

Frymëmarrje e rënduar.

Ndryshimet në shikim.

Të përziera ose të vjella të vazhdueshme.

Diagnoza dhe trajtimi

Ashpërsia varet nga nivelet e presionit të gjakut të nënës, simptomat dhe të dhënat e analizave laboratorike.

Anomalitë në analiza të tilla si funksioni i dobët i veshkave, trombocitet e ulëta, dhe simptomat neurologjike, të tilla si një dhimbje koke e fortë që nuk largohet edhe pas marrjes së ilaçeve, mund të konsiderohen si një gjendje e rëndë e preeklampsisë.

Trajtimi i preeklampsisë është lindja, thonë ekspertët. Ndërsa trajtimi mbështetës përfshin kryesisht medikamente që mbajnë presionin e gjakut në nivele të sigurta.

Zakonisht është vënë re se pacientët me preeklampsi pa karakteristika të rënda lindin në javën e 37-të dhe ata me preeklampsi me tipare të rënda lindin në javën e 34-të ose më herët.

Presioni i lartë i gjakut gjatë shtatzënisë mund të jetë i dëmshëm edhe për fëmijën. Një ndërlikim ndodh në rritjen e fetusit, që do të thotë se foshnja është më e vogël se sa duhet dhe mund të ketë nevojë për kujdes të specializuar gjatë ose pas lindjes.

Një ndërlikim tjetër i mundshëm është një gjendje kërcënuese për jetën e quajtur shkëputja e placentës, ku placenta ndahet nga muri i mitrës.

Hipertensioni gestacional

Hipertensioni gestacional ndodh kur një grua shtatzënë ka presion të lartë të gjakut, por nuk ka proteina në urinë. Ashtu si preeklampsia, ajo zakonisht diagnostikohet pas javës së 20-të të shtatzënisë.

Presioni i gjakut zakonisht kthehet në normalitet pas lindjes dhe trajtimi është zakonisht si ai që u jepet grave shtatzëna me preeklampsi pa karakteristika të rënda. Është e rëndësishme që gratë me presion të lartë të gjakut të flasin me mjekun përpara se të mbeten shtatzënë.

Ju sugjerojmë