Shkencëtarët sugjerojnë se respektimi i një diete vegane gjatë shtatzënisë mund të lidhet me një rrezik më të lartë për preeklampsi dhe lindjen e një fëmije me peshë më të ulët, sipas një studimi të publikuar në “Acta Obstetricia et Gynecologica Scandinavica”.
Hulumtimi përfshiu 66,738 gra shtatzëna daneze midis viteve 1996 dhe 2002. Pjesëmarrëset u ndanë në katër grupe dietike: vegjetarianë që hanin peshk dhe shpendë, vegjetarianë lakto/ovo që konsumonin qumësht dhe vezë, veganë dhe omnivorë. Studiuesit shqyrtuan ndërlikimet e shtatzënisë, si preeklampsia, dhe peshën e lindjes së të porsalindurve, shkruan burimi Health News përcjell Gazeta Shneta.
Nga të dhënat, 65,872 gra ndiqnin dieta omnivore, 666 ishin vegjetarianë të peshkut/shpendëve, 183 lakto/ovo-vegjetarianë dhe vetëm 18 veganë. Rezultatet treguan se gratë vegane kishin një rrezik më të lartë për preeklampsi dhe mundësi më të madhe për të pasur një fëmijë me peshë më të ulët lindjeje krahasuar me omnivorët.
Analiza e marrjes së proteinave dhe mikronutrientëve tregoi se veganët dhe lakto/ovo-vegjetarianët konsumonin më pak proteina dhe lëndë ushqyese, si vitamina B12, sesa omnivorët. Suplementet dietike mund të ndihmojnë në mbulimin e këtyre mangësive.
Megjithatë, studiuesit paralajmërojnë se numri i vogël i pjesëmarrësve veganë (18 persona) dhe faktorë të tjerë bëjnë që rezultatet të interpretohen me kujdes.
Keith Godfrey, profesor i epidemiologjisë, thekson se gjetjet janë të bazuara në një grup të vogël dhe nuk mund të përfaqësojnë të gjithë gratë shtatzëna vegane. /Gazeta Shneta/