Inflamacioni kronik, çekuilibrat hormonalë dhe problemet metabolike si rezistenca ndaj insulinës mund të kontribuojnë në këtë rrezik, sipas studiuesve.
Disa çrregullime gjinekologjike, si endometrioza, mund të lidhen me një rrezik më të lartë të sëmundjeve të zemrës dhe atyre që prekin trurin, zbulon një studim i ri shkruan burimi Euronews Health përcjell Gazeta Shneta.
Studiuesit shqyrtuan 28 studime që përfshinin mbi 3 milionë gra dhe analizuan çrregullime gjinekologjike si endometrioza, sindroma e vezoreve policistike (PCOS), dhimbjet menstruale (dismenorrea) dhe ciklet menstruale të çrregullta.
“Ne vendosëm të hetojmë lidhjen e mundshme të këtyre çrregullimeve me sëmundjet kardiovaskulare sepse sëmundjet e zemrës mbeten shkaku kryesor i vdekshmërisë në mbarë botën dhe të kuptuarit nëse personat me këto gjendje kanë një rrezik më të lartë është një pjesë e rëndësishme e parandalimit shëndetësor,” tha Mathew Leonardi, profesor në Universitetin McMaster në Kanada dhe një nga autorët e studimit, për Euronews Health në një email.
Sipas gjetjeve të publikuara në revistën “Heart”, gratë me të paktën një nga këto çrregullime gjinekologjike kishin një rrezik 28% më të lartë për të zhvilluar sëmundje kardiovaskulare ose cerebrovaskulare.
Sëmundjet cerebrovaskulare janë ato që ndikojnë në rrjedhjen e gjakut në tru.
Rritja e rrezikut ishte veçanërisht e dukshme tek gratë me endometriozë ose PCOS, një gjendje që ndikon në funksionin e vezoreve tek gratë.
“Një tjetër zbulim interesant ishte se në disa studime, ky rrezik i shtuar shfaqej relativisht herët në jetë, duke sugjeruar se ndërhyrja ose monitorimi i hershëm mund të bëjnë ndryshimin afatgjatë,” shtoi Leonardi.
Megjithatë, analiza nuk sugjeroi ndonjë rritje të rrezikut të vdekshmërisë për pacientët me çrregullime gjinekologjike.
Çrregullimet gjinekologjike mund të kenë ndikim sistemik
Studimi kontribuon “në rritjen e provave se sëmundjet gjinekologjike jo malinje nuk janë thjesht probleme të lokalizuara, por mund të kenë efekte sistemike” që rrisin rrezikun për sëmundje kardiovaskulare dhe cerebrovaskulare, tha Dr. Rachel Bond, kardiologe në “Dignity Health Medical Group”, në SHBA e cila nuk ishte pjesë e studimit.
Ekspertët besojnë se inflamacioni kronik, çekuilibrat hormonalë dhe problemet metabolike si rezistenca ndaj insulinës mund të jenë mekanizmat lidhës mes këtyre gjendjeve.
“Këto mekanizma ka të ngjarë të mbivendosen dhe të forcojnë njëri-tjetrin, duke nxjerrë në pah kompleksitetin e lidhjes mes shëndetit gjinekologjik dhe atij kardiovaskular,” tha Leonardi.
Sëmundjet kardiovaskulare, si sëmundjet e zemrës dhe goditjet në tru, janë shkaku kryesor i vdekjeve në mbarë botën, sipas Organizatës Botërore të Shëndetësisë (OBSH).
Në vendet e Bashkimit Evropian, këto sëmundje përbëjnë 43% të vdekjeve tek gratë dhe 36% tek burrat.
“Mesazhi kryesor është të jemi proaktivë – por jo të alarmuar,” tha Leonardi, duke këshilluar pacientet me çrregullime gjinekologjike të jenë të vëmendshme ndaj faktorëve të rrezikut kardiovaskular, si presioni i gjakut, kolesteroli dhe pesha. /Gazeta Shneta/