Ekspozimi i lehtë ndaj ndotësve të zakonshëm të smogut, siç janë grimcat e thithshme të ajrit dhe monoksidi i karbonit gjatë shtatzënisë, mund të ketë rezultate negative rreth shëndetit të nënës dhe fetusit, zbulon një studim i ri i grave në Kinë.
Hulumtimi, i publikuar në Open Medicine, u drejtua nga studiues të Universitetit Mjekësor Hebei në Shijiazhuang, Kinë.
Kina ka përjetuar rritje të konsiderueshme ekonomike në dekadat e fundit. Ndërsa kjo ka rritur prosperitetin, ka ardhur me një kosto në formën e ndotjes industriale.
Smogu kërcënon seriozisht shëndetin e njeriut dhe gratë shtatzëna dhe fetuset janë më të ndjeshme ndaj efekteve të tyre sesa popullata e përgjithshme.
Autori kryesor, Yijing Zhai dhe kolegët studiuan efektet e ndotësve të zakonshëm të smogut në rezultatet e shtatzënisë në Baoding, Hebei, një zonë në Kinë që përjeton ndotje të konsiderueshme të ajrit.
Ata lidhën nivelet e ndotësve të ndryshëm me rezultatet e shtatzënisë në 842 gra gjatë një periudhe trevjeçare. Këta ndotës përfshinin grimcat e thithshme të ajrit, monoksidin e karbonit, dioksidin e squfurit dhe dioksidin e azotit.
Studiuesit zbuluan se ekspozimi i lehtë ndaj grimcave të thithshme gjatë gjithë shtatzënisë rrit rrezikun e peshës së ulët të lindjes dhe ekspozimi i lehtë ndaj monoksidit të karbonit gjatë tremujorit të tretë kishte të njëjtin efekt.
Në mënyrë të ngjashme, ekspozimi i lehtë ndaj grimcave të thithshme rrit rrezikun e presionit të lartë të gjakut gjatë shtatzënisë, me ndjeshmëri të veçantë në tremujorin e parë dhe të tretë.
Ekspozimi ndaj dioksidit të azotit gjatë tremujorit të dytë pati një efekt të ngjashëm. Së fundi, ekspozimi ndaj grimcave të ajrit gjatë tremujorit të tretë rriti rrezikun e thyerjes së hershme të ujit.
Studimi përshkruan një tablo të zymtë të efekteve të këqija të ndotësve të zakonshëm të ajrit tek gratë shtatzëna dhe fëmijët e tyre të palindur dhe thekson nevojën për të shoqëruar rritjen ekonomike dhe industrializimin me mbrojtjen e mjedisit.
“Gjetjet e analizës sonë mund të ndihmojnë vendimmarrësit të zhvillojnë politika të synuara dhe masa mjedisore për të reduktuar rreziqet shëndetësore të ndotjes së ajrit,” përfundojnë autorët. /Gazeta Shneta/