Kërkime të reja sugjerojnë se stimulimi magnetik transkranial (TMS) mund të ngadalësojë përparimin e simptomave të sëmundjes Alzheimer, sipas një studimi paraprak të paraqitur në takimin e Clinical Trials in Alzheimer’s Disease në Madrid.
TMS, një procedurë jo invazive që përdoret shpesh për depresionin, u përdor për të shënjestruar një rrjet në tru të quajtur ‘’default mode network’’, i cili luan një rol të rëndësishëm në kujtesë dhe që preket shumë nga Alzheimeri, shkruan NBC News, transmeton Gazeta Shneta.
Në një provë të vogël klinike faza 2, pjesëmarrësit që morën seanca javore të TMS për një vit treguan një ngadalësim prej 44% në përkeqësimin e funksioneve njohëse krahasuar me ata që morën një trajtim placebo.
Studimi përfshiu 32 individë me Alzheimer, të moshave 56 deri në 88 vjeç. Studiuesit përdorën TMS për të stimuluar zona specifike të trurit, me shpresën për të forcuar lidhjet ndërmjet neuroneve dhe për të përmirësuar funksionet që lidhen me kujtesën.
Krahasuar me ilaçet e reja për Alzheimerin, të cilat gjithashtu ngadalësojnë përparimin e simptomave, por që kanë kosto të larta dhe efekte anësore serioze, TMS ofron një alternativë potencialisht më të sigurt dhe më ekonomike.
Pjesëmarrësit që morën TMS raportuan efekte anësore minimale, si dhimbje të lehta koke dhe shqetësim të lëkurës, me pak rënie në aftësitë funksionale të përditshme — një përfitim që mund të lehtësojë kërkesat për kujdes.
Megjithëse rezultatet duken premtuese, ekspertët theksojnë se përmasat e vogla të studimit dhe fakti që është zhvilluar vetëm në një qendër e kufizojnë përfundimin.
Nevojiten prova të fazës 3 në qendra të ndryshme për të konfirmuar rezultatet dhe për të vlerësuar zbatueshmërinë më të gjerë. Për më tepër, studiuesit synojnë të shqyrtojnë biomarkerë si nivelet e proteinave tau dhe amiloid për të përcaktuar nëse TMS ndikon drejtpërdrejt në patologjinë e sëmundjes.
Nëse është i suksesshëm, ky qasje mund të përfaqësojë një terapi të re, jo-medikamentoze për Alzheimerin, duke forcuar rrugët nervore që janë thelbësore për kujtesën./ Gazeta Shneta/