Një studim i ri në Mbretërinë e Bashkuar ka ngritur shqetësime serioze mbi shëndetin e brezave të rinj, duke treguar se ata/o po përballen me më shumë probleme shëndetësore krahasuar me brezat e mëparshëm në të njëjtën moshë.
Hulumtimi u realizua nga studiues të Universitetit King’s College London dhe Universitetit të Oksfordit.
Ekspertët analizuan të dhëna nga 51 studime afatgjata që kanë ndjekur shëndetin e dhjetëra mijëra britanikëve të lindur mes viteve 1946 dhe 2002.
Sipas rezultateve, brezat më të rinj nuk rezultojnë më të shëndetshëm se paraardhësit e tyre, pavarësisht përparimeve në mjekësi dhe kujdesin shëndetësor, shkruan burimi Euroneës Health transmeton Gazeta Shneta.
Problemet më të theksuara janë obeziteti, diabeti dhe çrregullimet e shëndetit mendor, si depresioni dhe ankthi.
Studiuesit e quajnë këtë fenomen “devijim gjeneracional i shëndetit”, duke nënkuptuar një përkeqësim gradual të gjendjes shëndetësore nga një brez te tjetri.
Sipas tyre, kjo situatë nuk mund të shpjegohet vetëm me diagnostikim më të mirë apo kontrolle më të shpeshta mjekësore. Ata theksojnë se faktorë si ushqimi jo i shëndetshëm, mungesa e aktivitetit fizik dhe ndikimet sociale e mjedisore kanë luajtur rol të madh në këtë prirje negative.
Studiuesit paralajmërojnë se ky trend mund të ketë pasoja serioze për sistemet shëndetësore dhe politikat publike në të ardhmen, sidomos duke pasur parasysh plakjen e popullsisë në Evropë. /Gazeta Shneta/