Një studim i ri dhe i gjerë shkencor ka zbuluar se terapia hormonale e përdorur gjatë menopauzës nuk rrit dhe as nuk ul rrezikun e zhvillimit të demencës tek gratë.
Studiuesit analizuan të dhëna nga disa studime cilësore, që përfshinin mbi një milion gra. Rezultatet treguan se nuk ekziston asnjë lidhje domethënëse mes terapisë hormonale dhe demencës, pavarësisht llojit të hormoneve të përdorura, kohëzgjatjes së trajtimit apo moshës kur ka nisur terapia.
Po ashtu, studimi nuk gjeti prova se terapia hormonale ndikon në rrezikun për demencë edhe tek gratë që përjetojnë menopauzë të hershme.
Sipas autorëve të studimit, vendimi për përdorimin e terapisë hormonale duhet të bazohet në menaxhimin e simptomave të menopauzës dhe në vlerësimin e përfitimeve dhe rreziqeve të tjera shëndetësore, e jo në frikën për humbje të kujtesës apo demencë në të ardhmen.
Së fundmi, Administrata Amerikane e Ushqimit dhe Barnave (FDA) ka hequr paralajmërimet e njohura si “black box” nga produktet hormonale për menopauzën, paralajmërime që sipas ekspertëve përmbanin pretendime të pabazuara mbi rrezikun për demencë.
Autorja kryesore e studimit thekson se, megjithëse nevojiten studime afatgjata dhe më gjithëpërfshirëse, këto gjetje ndihmojnë në sqarimin e konfuzionit dhe informacionit kontradiktor që ka qarkulluar prej vitesh rreth terapisë hormonale dhe shëndetit të trurit./Gazeta Shneta/