Një metodë e re, e bazuar në inteligjencë artificiale, mund të ndihmojë pacientët me artrit reumatoid të gjejnë trajtimin biologjik më të përshtatshëm që në përpjekjen e parë.
Studiuesit nga Queen Mary, University of London, njoftuan se teknika e tyre arriti të parashikojë me sukses terapinë më efektive në 79–85% të rasteve në testimet fillestare, shkruan burimi Medical News Today transmeton Gazeta Shneta.
Terapitë biologjike janë ilaçe që synojnë mekanizma specifikë të inflamacionit, pa shtypur të gjithë sistemin imunitar, siç bëjnë trajtimet tradicionale. Kjo është veçanërisht e rëndësishme për artritin reumatoid, një sëmundje autoimune kronike që shkakton dhimbje, inflamacion dhe kufizim të lëvizshmërisë.
Për shkak se 40% e terapive biologjike dështojnë për shkak të zgjedhjes së gabuar të ilaçit, kjo metodë e re mund të reduktojë periudhat e dhimbjes dhe pasigurisë për pacientët.
Studiuesit analizuan mostrat e indeve nga nyjet e prekura dhe matën aktivitetin e 524 gjeneve për të përcaktuar përgjigjen më të mundshme ndaj tre biologjikëve: etanercept, tocilizumab dhe rituximab.
Metoda premton përparim të madh në mjekësinë e personalizuar, por ekspertët paralajmërojnë se duhen më shumë prova klinike para se të përdoret gjerësisht.
Institucioni Queen Mary është në kërkim të partnerëve komercialë për të zhvilluar më tej këtë teknologji, por ende nuk ka afat zyrtar për përdorim praktik. /Gazeta Shneta/