Presidenti i SHBA-së, Donald Trump, të premten përsëriti thirrjen e tij për gratë shtatzëna dhe fëmijët e vegjël që të ndalojnë përdorimin e ilaçit të njohur kundër dhimbjeve Tylenol, duke sfiduar kritikat e përhapura nga grupet mjekësore, dhe ofroi këshilla të mëtejshme për kujdesin shëndetësor që nuk mbështeten nga shkenca.
Në një konferencë të jashtëzakonshme për shtyp në Shtëpinë e Bardhë të hënën, Trump e lidhi autizmin me vaksinat e fëmijërisë dhe marrjen e Tylenol nga gratë gjatë shtatzënisë, duke i ngritur pretendimet që nuk mbështeten nga prova shkencore në plan të parë të politikës shëndetësore të SHBA-së, raporton Reuters, transmeton Gazeta Shenta.
Në një postim në Truth Social të premten, presidenti republikan bëri përsëri thirrje që vaksina e kombinuar kundër fruthit, shytave dhe rubeolës të ndahet në doza të veçanta, dhe që fëmijët të mos e marrin vaksinën e hepatitit B, që normalisht jepet në 24 orët e para pas lindjes, para moshës 12 vjeç.
“Gra shtatzëna, MOS E PËRDORNI TYLENOLIN PËRVEÇ NËSE NUK ËSHTË ABSOLUTISHT E NEVOJSHME, MOS I JEPNI TYLENOL FËMIJËS TUAJ TË VOGËL PËR ASNJË ARSYE, NDAJENI VAKSINËN MMR NË TRE DOZA TË VEÇANTA (JO TË PËRZIERA!), MERRNI VAKSINËN E HEPATITI B VEÇANTË, MERRNI VAKSINËN E HEPATITIT B NË MOSHËN 12 VJEÇ, OSE MË TË MADHE, DHE, MË E RËNDËSISHME, MERRNI VAKSINA NË 5 VIZITA TË VEÇANTA MJEKËSORE!”, shkroi Trump.
Këshilla nga Trump shkon kundër asaj të shoqatave mjekësore, të cilat citojnë të dhëna nga studime të shumta dhe dekada praktike që tregojnë se acetaminofeni, përbërësi aktiv në Tylenol, është i sigurt kur përdoret nën kujdesin e një mjeku gjatë shtatzënisë. Dhjetëra grupe mjekësore, kërkimore dhe avokatie për autizmin e kanë kritikuar njoftimin.
Ekspertët e shëndetësisë kanë thënë se thirrja për disa vizita te mjeku është një shqetësim i panevojshëm që ka të ngjarë të ulë përvetësimin e vaksinës dhe të jetë një pengesë për aksesin e shumë njerëzve.
Postimi i së premtes dhe njoftimi i së hënës të kujtojnë konferencat e rregullta për shtyp të Trump në muajt e parë të pandemisë COVID-19, kur ai shpesh jepte këshilla të pabazuara në shkencë, duke përfshirë pyetjen e tij nëse gëlltitja e zbardhuesit do të ndihmonte dhe nxitjen e trajtimeve që nuk u sjellin dobi pacientëve me COVID.
Edhe pse nuk e përmendi autizmin të premten, këshilla mjekësore e Trump vjen ndërsa ekipi i tij i shëndetit publik kërkoi këtë javë të zbutte mesazhin fillestar që lidhte acetaminofenin me autizmin.
Drejtori i Institutit Kombëtar të Shëndetit në paraqitjet në media dhe komisioneri i Administratës së Ushqimit dhe Barnave në një njoftim me shkrim drejtuar mjekëve thanë se ekziston një lidhje, jo një lidhje e provuar, dhe se gratë duhet të konsultohen me mjekët e tyre./Gazeta Shneta/