Franca regjistroi 2,025 vdekje më shumë gjatë javës që nisi më 22 qershor, kulmi i valës së të nxehtit që përfshiu vendin, sipas të dhënave të publikuara nga agjencia kombëtare e shëndetit publik Santé publique France.
Sipas raportit, numri i vdekjeve u rrit me 29.1% krahasuar me javën paraprake, ndërsa autoritetet paralajmërojnë se shifra reale mund të jetë edhe më e lartë, pasi të dhënat janë ende paraprake, shkruan Euronews Health transmeton Gazeta Shneta.
Rritja më e madhe e vdekjeve u regjistrua në rajonin e Parisit, ku mortaliteti u rrit me 62%, ndërsa një rritje e ngjashme u raportua edhe në rajonin Pays de la Loire në perëndim të Francës.
Vala e të nxehtit zgjati rreth 11 ditë, me temperatura që në shumë zona kaluan 40 gradë Celsius. Edhe pse autoritetet e cilësojnë këtë episod si më intensiv se vala shkatërruese e vitit 2003, ata vlerësojnë se ndikimi në shëndetin publik pritet të jetë më i ulët.
Drejtori i përgjithshëm i sistemit spitalor publik të Parisit, Nicolas Revel, tha se numri përfundimtar i viktimave ka gjasa të jetë më i ulët se ai i vitit 2003, kur humbën jetën rreth 15 mijë persona, por pritet të tejkalojë bilancin e valës së të nxehtit të vitit të kaluar, e cila u lidh me rreth 5,700 vdekje.
Ndërkohë, opozita ka kritikuar reagimin e qeverisë franceze ndaj temperaturave ekstreme. Partia e Gjelbër ka dorëzuar një mocion mosbesimi ndaj qeverisë, duke e akuzuar se nuk ka ndërmarrë masa të mjaftueshme për t’u përgatitur për valët gjithnjë e më të shpeshta të të nxehtit.