Paul Aleksander ka vdekur para tre ditësh. Ai ka jetuar mbi 70 vjet në një pajisje të hekurt e cila i ka ndihmuar mushkëritë e tij që të mbushen me oksigjen.
Në verën e vitit 1952 Paul u sëmurë me poliomielit në një epidemi të rëndë me dhjetra mijëra raste në SHBA. Nëna e kishte dërguar të birin tek mjekët por sipas The Guardian ata kishin thënë se nuk mund të bëjnë asgjë. Paul mbeti në korridor dhe mezi po merrte frymë.
Megjithatë një mjek vendosi t’i bënte sërish disa analiza dhe e futi në sallën e operacionit për t’i bërë trakeotomi urgjente (hapje të fytit) për zhbllokimin e frymëmarrjes. Tre ditë më vonë ai u zgjua me trupin e tij të zhytur në një makineri që zëvendësonte frymëmarrjen e tij.
Paul u shërua nga infeksioni por sëmundja e la atë të paralizuar nga qafa poshtë dhe të paaftë për të marr frymë vetë. Megjithatë ai ishte në gjendje që të merrte frymë përmes ‘mushkërive të hekurit’, një cilindër gjigant metalik që ndryshon presionin e ajrit.
“Mjekët na thanë se Paul nuk mund të jetonte”, kishte thënë nëna e tij Doris në autobiografinë për CNN, transmeton Gazeta Shneta. “Ka pasur disa raste kur ndalej rryma dhe mushkëria e tij duhej të pompohej me dorë. Fqinjët vraponin për të na ndihmuar”, ka rrëfyer ajo.
I ndjeri kaloi shtatë dekada në këtë cilindër metalik i cili i ka mbushur mushkërit e tij me ajër.
Pajisja ka një respirator që shtynë ajrin në mushkëri me metodën e frymëmarrjes artificiale të quajtur Ventilimi me Presion Negativ të Jashtëm (ENPV).
Paul në moshën 8 vjeçare mësoi të merrte frymë vetë deri në tre minuta duke “gëlltitur” ajër si një peshk, sipas The Neë York Times. Në moshën 21 vjeçare ai u bë personi i parë që u diplomua në një shkollë të mesme në Dallas pa ndjekur mësimin fizikisht në klasë. Më pas ai vazhdoi studimet në drejtësi në Universitetin e Teksasit në Austin. /Gazeta Shneta/
