Një analizë e re ka zbuluar se pacientët me kancer që ndihen të vetmuar ose janë të izoluar shoqërisht kanë rrezik më të lartë për të vdekur – si nga kanceri, ashtu edhe nga shkaqe të tjera.
Studimi i botuar në revistën “BMJ Oncology”, tregon se ndjenja e vetmisë ose izolimit shoqëror lidhet me një rritje prej 34% të rrezikut të vdekjes nga çdo shkak dhe 11% më shumë rrezik për vdekje nga kanceri, shkruan Euronews Health transmeton Gazeta Shneta.
Ekipi kërkimor nga Kanadaja analizoi të dhëna nga 16 studime të mëparshme që përfshinin mbi 1.6 milionë pacientë me kancer nga Kanadaja, Anglia, Finlanda, Franca, Irlanda, Japonia dhe Shtetet e Bashkuara.
Sipas studiuesve, “vetmia dhe izolimi shoqëror mund të ndikojnë në rezultatet e trajtimit të kancerit përtej faktorëve biologjikë ose mjekësorë tradicional”.
Megjithëse të lidhura, vetmia dhe izolimi nuk janë e njëjta gjë. Izolimi përfshin mungesën e kontakteve me të tjerët, ndërsa vetmia është ndjenja e të qenit i vetëm apo i shkëputur. Në nivel biologjik, vetmia mund të shkaktojë stres kronik, dobësim të sistemit imunitar dhe inflamacion, duke përkeqësuar sëmundjen.
Studiuesit theksojnë se rezultatet kanë kufizime, pasi studimet e përfshira përdorën metoda të ndryshme, por gjetjet përforcojnë provat ekzistuese se vetmia dëmton shëndetin. Studimet e mëparshme e lidhin atë me rritje të rrezikut për sëmundje të zemrës, diabet, demencë dhe depresion.
Në një kohë kur rastet e reja të kancerit parashikohen të rriten me 75% deri në vitin 2050, studiuesit theksojnë nevojën për mbështetje më të fortë psikologjike për pacientët dhe kërkime të reja për ndërhyrje psikosociale në kujdesin onkologjik. /Gazeta Shneta/