Deputeti i Listës Guxo Haxhi Avdyli ka folur pasi shefja e partisë së tij tha se do ta propozojë për ministër të Shëndetësisë.
Avdyli ka thënë se përmendja e emrit të tij për ministër po bëhet nga njerëz dashamir dhe i falënderon ata që e konsiderojnë si të denj për këtë pozitë, shkruan Gazeta Shneta.
“Asnjëherë nuk kam tentuar dhe askush nuk po bën hajgare. Më shumë janë përmendje e insistim e te mediave e njerëzve dashamir. I falenderoj të gjithë ata që kanë konsideratë që jam i denjë për atë pozite. Por i nderuar Bujar, unë jam komod në pozitën e deputetit dhe nga aty po mundohem të jap kontribut me aq sa po mundem e aq sa po di për shëndetësinë dhe proceset tjera”, ka deklaruar Avdyli.
Ai është shprehur kështu në një koment në statusin e gazetarit Bujar Vitija i cili tha se Lista Guxo e dijnë se Avdyli nuk mund të bëhet ministër, por po e propozojnë atë për të bërë hajgare.
“Haxhi Avdyli mbreme kryetarja e Guxo tha se do ta propozoj emrin tend per minister. Me sa e di marreveshja e koalicionit nuk ju mundeson te keni edhe nje ministri ne Qeveri. T’u e pas parasyshe kete fakt nuk e kuptova deklaraten e Gervalles”, ka shkruar Vitija në komentin e tij.
Ndryshe mbrëmë në një intervistë bashkëkryetarja e Listës Guxo Donika Gërvalla tha se do t’ia propozojë Kurtit emrin e Avdylit për ministër.
“Unë mendoj që Partia Guxo ka një kandidat të shkëlqyer, mendoj që deputeti Haxhi Avdyli jo vetëm që do ti shërbente këtij institucioni…Nëse kryeministri Kurti do të jetë dakord, unë do t’ia bëjë këtë propozim. Prandaj shprehjet e mendimit individual të deputetëve janë shumë të mirë se ardhura. Unë mendoj që Burim Meta e ka pasur në mendje Haxhi Avdylin. Mua, Haxhi Avdyli më duket se është kandidati më i mirë i mundshëm”, shtoi ajo në televizionin publik.
Emrat për ministrin e ardhshëm të shëndetësisë po përfliten pas dorëheqjes së Rifat Latifit nga kjo pozitë. Aktualisht kryeministri Albin Kurti e ka emëruar ud. të ministres Dafina Gexha-Bunjakun. /Gazeta Shneta/