Në botën e sotme, dëshira dhe qëllimi kryesor i çdo prindi është të sigurojë një shtatzëni të shëndetshme dhe të lindë një fëmijë pa probleme gjenetike dhe morfologjike. Ky qëllim ka një domethënie të thellë për çdo çift dhe është në qendër të kujdesit mjekësor.
Dr. Selami Sylejmani, gjinekolog në poliklinikën “GINEKOS”, shpjegon se për të arritur këtë qëllim, është shumë e rëndësishme që gratë shtatzëna të kenë një regjim kontrollash dhe vizitash te gjinekologu gjatë shtatzënisë, shkruan Gazeta Shneta.
“Gjinekologu duhet të udhëzojë çdo shtatzënë për analizat që duhet të bëjë gjatë shtatzënisë për të arritur qëllimin e lindjes së një fëmije të shëndetshëm,” thotë ai.
Dr. Sylejmani e cilëson ultrazërin si një mjet të rëndësishëm, që luan rolin e një “stetoskopi të dytë”, për të siguruar një diagnostikim të saktë.
“Diagnostikimi i mirë është gjysma e punës gjatë shtatzënisë. Mjetet kryesore janë ultrazëri dhe analizat, që përfshijnë teste specifike dhe gjenetike,” shpjegon ai.
Dr. Sylejmani shprehet se një element i rëndësishëm i këtij diagnostikimi është përdorimi i testeve gjenetike, të cilat ndahen në dy grupe: invazive dhe jo invazive.
“Testet gjenetike janë të domosdoshme dhe ofrojnë informacion të vlefshëm për të siguruar një shtatzëni të shëndetshme,” thotë ai.
Gjinekologu Sylejmani thekson se një nga zhvillimet më të rëndësishme në këtë fushë është testi NIPT, i cili ka bërë hapa të mëdhenj përpara në diagnozën e problemeve gjenetike.
“Testi NIPT është testi më i besueshëm, me një shkallë besueshmërie mbi 99%. Ky test mund të identifikojë sindromat Down dhe Edwards, si dhe çrregullime të tjera gjenetike,” shprehet Sylejmani.
Tutje, Dr. Sylejmani shpjegon se ka disa faktorë që mund ta ndikojnë saktësinë e testeve gjenetike. Pesha e nënës dhe obeziteti janë dy faktorë të rëndësishëm që mund të vështirësojnë procesin e mbledhjes së ADN-së për testin NIPT.
“Sa më e madhe të jetë pesha e nënës, aq më i vështirë bëhet mbledhja e ADN-së së lirë, sepse ka më pak fraksione të ADN-së që mund të merren nga gjaku i nënës,” sqaron tutje ai.
Për këto dhe detaje të tjera ndiqeni intervistën: