Studimet e mëparshme kanë treguar se kontakti fizik i foshnjës dhe prindërve ndihmon në përmirësimin e marrëdhënieve në mes tyre. Por, sipas disa informatave të reja, një kontakt i tillë duhet të përjashtohet përgjatë kohës kur është në gjumë foshnja.
Nëse qëndroni shumë pranë fëmijëve tuaj kur i vini në gjumë, ky mund të jetë një zakon i dëmshëm. Ekspertët paralajëmrojnë se diçka e tillë krijon probleme me fjetjen kur fëmijët të rriten.
Studimet kanë treguar se 50 për qind e nënave shtrihen bashkë me fëmijët për t’i vënë në gjumë deri në moshën 12-vjeçare, ndërsa 25% e fëmijëve e kanë të pamundur të flenë nëse nuk kanë pranë prindin ose një objekt të dashur për ta që mund të jetë një arush, një lodër, një batanije e butë etj.
“Shumica e fëmijëve do të mësojnë të flenë vetëm pa prindërit kur të jenë në shkollë të mesme”, – tha Andrew J. Bernstein, një mjek dhe anëtar i Akademisë Amerikane të Pediatrisë.
“Nëse fëmija është mësuar të flejë me prindin pranë gjithmonë, kur të ndahet do ta ketë shumë të vështirë dhe kjo do të shtyjë orarin e fjetjes”.
Mjeku Noah Siegel thotë se kjo praktikë në fëmijëri i vë fëmijët përpara rrezikut të pagjumësisë kur të rriten. Rrjedhimisht nëse fëmijët flenë më pak, do të jenë më të ekspozuar ndaj problemeve shëndetësore.
Por, praktika e të vënit fëmijët në gjumë duke u shtrirë bashkë me ta nuk është e mirë as për prindërit, të cilët humbasin shumë kohë në këtë mënyrë dhe e kanë të pamundur të pushojnë vetë pas lodhjes gjatë ditës./pernenat.al/