Në janar të këtij viti është bërë furnizimi i fundit me infusione në Qendrën Kryesore të Mjekësisë Familjare në Komunën e Malishevës, tash e dy muaj kjo qendër nuk është furnizuar me asnjë llojë të infusioneve, të nevojshëm për pacientët shkruan Gazeta Shneta.
Punëtori i Barnatorës Qendrore në këtë qendër, Afrim Morina, thotë se me infusione pritet të furnizohen nesër përderisa shton se Ministria e Shëndetësisë gjatë këtij muaji nuk ka bërë furnizim as me tabletën “Metformim” – 250ml, tablet e nevojshme për pacientët diabetik apo me sheqer në gjakë. Kjo qendër ka mungesë edhe të sistemeve për infusione, “Antibiotik” dhe “Centriaksione”.
“Me këto produkte kemi mungesë nga dy apo tre ditë, jo më shumë”, tregon Morina.
Ai thotë se tash e 35 vite punon në Barnatorën Qendrore në Malishevë, dhe se asnjëherë Qendra Kryesore e Mjekësisë Familjare në këtë komunë nuk ka qenë e furnizuar me të gjitha llojet e barnave dhe materialeve shpenzuese nga lista esenciale, për këtë ai e vë fajin tek mungesa e Sigurimeve Shëndetësore.
“Jo. Asnjëherë nuk ka qenë e furnizuar komplet dhe është e pamundur me u furnizu komplet pa i pas Sigurimet Shëndetësore”, shprehet ai për Gazetën Shneta.
Sikurse në shumë QKMF tjera në vend edhe kjo qendër është furnizuar me disa nga produktet medicinale përmes buxhetit komunal. Punëtori i barnatorës i thekson disa prej tyre “me buxhet komunal kemi ble fllasera, disa lloje të ampullave, “Getamicinë”, fasha””
Në anën tjetër, Ministria e Shëndetësisë thotë se Kujdesi Parësor Shëndetësor është i furnizuar me 70 përqind të Barnave nga Lista Esenciale, duke shtuar se janë të hapura procedurat për përmirësimin e më tutjeshëm për të gjitha produktet medicinale.
“Furnizimet me material shpenzuese janë 98% aktualisht, një shifër më e lartë se kurdoherë më parë, ndërsa me barna nga Lista e Barnave Esenciale, rreth 70% dhe pritet përmirësimi i mëtejmë duke qenë që janë të hapura procedurat për të gjitha produktet që mungojnë”, thuhet në përgjigjen e ministrisë dhënë për Gazetën Shneta.
Mungesë të barnave dhe materialeve shpenzuese ka është në qendrat shëndetësore në vend, për të cilat Gazeta ka raportuar. /Gazeta Shneta/
QKMF në Pejë ka mungesë të infuzioneve për fëmijë, shpatulla druri dhe barnave tjera esenciale