Mjekja obsteter- gjinekologe, Elvana Toska ka treguar se pse është i rëndësishëm tremujori i parë i shtatzënisë te çdo grua. E ftuar në “ABC e Mëngjesit”, ajo ka zbuluar arsyet, të cilat të gjitha nënat duhet t’i kenë parasysh.
“Është shumë i rëndësishëm për shumë arsye. Së pari, për ndryshimet që pëson nëna gjatë kësaj periudhe dhe ndryshimet që ka produkti i ri që është konceptuar tashmë dhe po fillon rritjen dhe zhvillimin në organizmin e nënës. Shpeshherë, gratë ngatërrohen me faktin që bëjnë ekon e parë, ndërkohë që janë 6 apo 7 javë dhe thonë: ‘Unë kam një vonesë të vogël cikli, si ka mundësi që jam një muaj, apo një muaj e gjysmë’. Është pikërisht kjo që ju përmenda, fillon ndryshimi. Pra, ndryshimet e embrionit fillojnë që në momentin e konceptimit, i cili nuk arrihet shpeshherë të përceptohet nga gruaja. Prandaj, edhe ne marrim si fillim të tremujorit, ditën e parë të ciklit të fundit”, u shpreh mjekja.
Më tej, ajo theksoi se janë disa analiza që duhen bërë me domosdoshmëri që në 3-mujorin e parë, pasi nuk përsëriten më deri në fund të shtatzënisë.