Pas interesimit të “Betimi për Drejtësi”, Shërbimi Spitalor Klinik Universitar i Kosovës (ShSKUK) i ka përmirësuar kriteret e konkursit për drejtor të spitaleve, të cilat kritere i kishte vendosur në kundërshtim me statutin e saj, duke i quajtur si “gabime teknike”.
ShSKUK, të premten e kaluar ka hapur të konkurs për tre drejtorë të përgjithshëm në tri spitale rajonale, në atë të Mitrovicës, Ferizajt dhe të Gjakovës, raporton “Betimi për Drejtësi“.
Në kriteret e këtij konkursi, thuhej se kandidatët për këtë pozitë duhet të kenë së paku katër vite përvojë profesionale, prej tyre dy në pozita udhëheqëse, i cili kriter ishte në kundërshtim me Statutin e Shërbimit Spitalor Klinik Universitar të Kosovës.
“Së paku katër vite përvojë pune profesionale, prej tyre dy në pozita udhëheqëse”, thuhet në konkursin e publikuar në uebfaqe të ShSKUK-së më 9 shkurt 2024.
Në këtë konkurs, ishte ulur edhe kriteri për përvojë pune profesionale, pasi që Statuti i ShSKUK-së, neni 25, pika 3, Drejtimi i njësive përbërëse të ShSKUK-ës, thotë se kandidatët për drejtorë duhet të kenë gjashtë vite përvojë pune profesionale, prej tyre tre vite duhet të jenë menaxheriale.
“3. Drejtorët apo udhëheqësit si në paragrafi 1 të këtij neni, duhet të kenë të përfunduar shkollimin universitar në ndonjërën nga fushat: shkenca mjekësore, ekonomi, juridik, administratë, si dhe duhet të kenë gjashtë (6) vite punë profesionale prej tyre tri (3) menaxheriale”, thuhet në Statutin e ShSKUK-së, i cili ka hyrë në fuqi më 5 janar 2024.
“Betimi për Drejtësi” një ditë më parë ka adresuar pyetje në ShSKUK, lidhur me këto shkelje, por nga ShSKUK thonë se ka qenë një gabim teknik.
“Tek kriteret dhe dokumentacioni i kërkuar, është bërë një gabim teknik sa i përketë përvojës së punës. Menjëherë pasi kemi vërejtur këtë gabim teknik, Sektori i Burimeve Njerëzore ka lëshuar njoftimin me të cilin ka plotësuar – ndryshuar nga: së paku katër (4) vite përvojë pune profesionale, prej tyre dy (2) vite në pozitë udhëheqëse (vërtetim nga punëdhënësi dhe pasqyrën nga Trusti); ndryshohet në së paku gjashtë (6) vite përvojë pune profesionale, prej tyre tre (3) vite në pozitë udhëheqëse (vërtetim nga punëdhënësi dhe pasqyrën nga Trusti) “, thuhet në përgjigjen e ShSKUK-së për “Betimi për Drejtësi”.
Pas interesimit të “Betimi për Drejtësi”, kriteret janë përmirësuar dhe janë publikuar në uebfaqen e ShSKUK-së.
Spitali i Ferizajt që nga shtatori i vitit 2022 është me ushtrues detyre, po ashtu Spitali Rajonal në Mitrovicë është me ushtrues detyre që nga muaji nëntor 2023, ndërsa ai në Gjakovë që nga shtatori i vitit paraprak. /BetimipërDrejtësi