Një studim i fundit i kryer në Universitetin e Oulu në Finlandë ka zbuluar se fëmijët, nënat e të cilëve kanë marrë trajtim antibiotik gjatë lindjes, kanë më shumë gjasa të zhvillojnë sëmundje autoimune, si diabeti i tipit 1, sëmundja celiake dhe sëmundjet reumatike.
Megjithatë, studimi nuk ka treguar lidhje mes përdorimit të antibiotikëve dhe zhvillimit të sëmundjeve alergjike apo astmës tek fëmijët, shkruan burimi Medical Xpress përcjell Gazeta Shneta.
Studimi, i bazuar në regjistrat e rreth 46,000 fëmijëve, thekson se administrimi i antibiotikëve gjatë lindjes është efikas për parandalimin e infeksioneve të rënda të shkaktuara nga streptokoku i grupit B, duke reduktuar vdekshmërinë tek të porsalindurit.
Në Finlandë, rreth një në katër gra që lindin në formë vaginale marrin antibiotikë për të parandaluar këtë infeksion.
Megjithatë, gjetjet e studimit nxjerrin në pah mundësinë që përdorimi i antibiotikëve të ndikojë në zhvillimin e mikrobiotës së zorrëve të fëmijës, e cila mund të ketë implikime afatgjata për shëndetin e tij.
Sofia Ainonen, studiuese e doktoraturës në Universitetin e Oulu, sqaron se ky është një studim vëzhgues dhe nuk vërteton një lidhje shkak-pasojë mes antibiotikëve dhe zhvillimit të sëmundjeve autoimune më vonë në jetë. /Gazeta Shneta/