Sipas rekomandimeve të fundit, prindërit mund të fillojnë të heqin shishen e natës midis moshës 6 dhe 9 muajsh. Në këtë periudhë, shumica e fëmijëve janë të aftë të vetërregullojnë ushqimin e tyre, duke treguar qartë kur nuk kanë më nevojë për qumësht gjatë natës. Shenja tipike është kur foshnja kthen kokën anash ose nuk e përfundon shishen rregullisht.
Sipas burimit Baby Center, nëse fëmija juaj ka lindur para kohe ose ka probleme shëndetësore, si vështirësi në tretje apo vonesa në zhvillim, është e domosdoshme që ndryshimet në orarin e ushqyerjes të bëhen vetëm pas konsultimit me mjekun.
Mbajtja e shishes përpara gjumit për një kohë të gjatë mund të krijojë varësi emocionale. Kjo e bën më të vështirë që fëmija të mësojë të flejë vetë, pasi lidhet ngushtë me shishen si pjesë e rutinës së gjumit, transmeton Gazeta Shneta.
Për më tepër, kur dalin dhëmbët e parë, rreziku i prishjes së tyre rritet. Qumështi që mbetet në gojë gjatë gjumit lejon sheqernat natyrale të sulmojnë dhëmbët, duke shkaktuar karies të hershëm.
Ekspertët këshillojnë që shishja e natës të largohet plotësisht rreth moshës 12 muajsh. Edhe pse mund të duket një zakon i vështirë për t’u ndërprerë, prindërit duhet të jenë të qetë: në këtë moshë, fëmija nuk ka më nevojë për kalori shtesë nga qumështi gjatë natës.
Në moshën njëvjeçare, fëmija i plotëson kërkesat ushqyese përmes vakteve ditore dhe ushqimeve të lehta, duke mos pasur nevojë për shishe përpara gjumit. /Gazeta Shneta/