Një studim i ri sugjeron se në disa individë, depresioni i hershëm mund të lidhet me të njëjtin grumbullim të pllakave toksike në tru që shoqërohen me sëmundjen e Alzheimerit.
Sipas burimit Health Day, zbulimet ofrojnë prova të mëtejshme se simptomat depresive mund të jenë një shenjë e hershme e fazës paraklinike të sëmundjes, thanë ekipi i udhëhequr nga Katerina Munro, neuropsikologe në “Brigham and Women’s Hospital”, në Boston.
“Simptomat depresive nuk shkaktojnë Alzheimerin, por patologjia e hershme e sëmundjes në trurin e prekur mund të rezultojë në depresion relativisht herët,” shpjegoi Dr. Marc Gordon, ekspert që nuk mori pjesë në studim.
Studiuesit e Bostonit theksuan se simptomat neuropsikiatrike, veçanërisht depresioni, janë të zakonshme tek pacientët me Alzheimer. Megjithatë, lidhja e saktë midis depresionit të ri dhe zhvillimit të sëmundjes ka qenë e paqartë deri më tani.
Zbulimet janë veçanërisht të rëndësishme në një kohë kur ilaçet e reja për Alzheimerin mund të ndihmojnë në ngadalësimin e përparimit të sëmundjes.
Studiuesit rekomandojnë monitorim të kujdesshëm të simptomave të reja emocionale dhe depresive tek të moshuarit, përveç vlerësimit të ndryshimeve njohëse, si pjesë e ekzaminimeve klinike për Alzheimerin.
Studimi u publikua në “JAMA Network Open” dhe thekson rëndësinë e njohjes së hershme të shenjave që mund të parashikojnë zhvillimin e sëmundjes, duke mundësuar ndërhyrje më të hershme dhe përmirësim të kujdesit për pacientët. /Gazeta Shneta/