Konsumimi i rregullt i pijeve të ëmbëlsuara me sheqer, si pijet e gazuara dhe lëngjet industriale, mund të lidhet me një rrezik më të lartë për zhvillimin e kancerit të mëlçisë, sipas një studimi të ri të publikuar në revistën shkencore JAMA Network Open.
Hulumtuesit analizuan të dhënat dietike të më shumë se 1.5 milionë të rriturve të përfshirë në 11 studime afatgjata. Pjesëmarrësit u ndoqën për një periudhë mesatare prej gati 18 vitesh, me qëllim të vlerësimit të lidhjes ndërmjet konsumimit të pijeve të ëmbëlsuara me sheqer dhe rrezikut për kancer të mëlçisë.
Rezultatet treguan se personat që konsumonin më shumë pije me sheqer kishin rrezik më të lartë për dy nënlloje kryesore të kancerit të mëlçisë: Hepatocellular Carcinoma (HCC) dhe Intrahepatic Cholangiocarcinoma (ICC).
Nga ana tjetër, studiuesit nuk gjetën lidhje të ngjashme mes konsumimit të pijeve të ëmbëlsuara artificialisht dhe rrezikut për kancer të mëlçisë.
Studimi u udhëhoq nga Cody Watling nga National Cancer Institute dhe u publikua më 10 qershor.
Megjithëse studimi nuk dëshmon drejtpërdrejt se pijet me sheqer shkaktojnë kancer të mëlçisë, autorët theksojnë se gjetjet i shtohen provave në rritje që lidhin konsumimin e këtyre pijeve me pasoja të dëmshme afatgjata për shëndetin.
Ekspertët rekomandojnë kufizimin e konsumimit të pijeve me sheqer dhe zëvendësimin e tyre me ujë ose alternativa më të shëndetshme, si pjesë e një stili jetese që ndihmon në ruajtjen e shëndetit të mëlçisë dhe parandalimin e sëmundjeve kronike.