Ministrat e Shëndetësisë të Bashkimit Evropian kanë arritur një qëndrim të përbashkët mbi Direktivën e Aktit të Bioteknologjisë (Biotech Act I), një pjesë e rëndësishme e paketës së re legjislative që synon të forcojë konkurrueshmërinë e Evropës në sektorin e bioteknologjisë.
Marrëveshja u arrit gjatë takimit të mbajtur më 16 qershor dhe përfshin ndryshime në rregullat që lidhen me mikroorganizmat e modifikuar gjenetikisht (GMM) dhe përpunimin e organeve për transplantim, shkruan Euronews Health, transmeton Gazeta Shneta.
Sipas zyrtarëve evropianë, ndryshimet synojnë të përditësojnë legjislacionin ekzistues, të reduktojnë barrën administrative për sektorin e bioteknologjisë dhe të përmirësojnë bashkëpunimin ndërkufitar në fushën e transplantimit të organeve.
Ministri i Shëndetësisë i Qipros, Neophytos Charalambides, tha se zhvillimet e mëdha në bioteknologji gjatë viteve të fundit e bëjnë të domosdoshëm modernizimin e rregullave aktuale.
“Përditësimi i këtij legjislacioni nuk është vetëm një hap logjik, por edhe një imperativ etik”, deklaroi ai.
Ndër ndryshimet kryesore, vendet anëtare ranë dakord të zëvendësojnë termin “mikroorganizma me rrezik të ulët” me “mikroorganizma të përshtatshëm për procedurë të përshpejtuar”, si dhe të kufizojnë në maksimum 10 vjet vlefshmërinë e pëlqimit për vendosjen e tyre në treg.
Po ashtu, direktiva përfshin dispozita që në raste të caktuara lejojnë përpunimin e të dhënave personale kur kjo konsiderohet në interes publik.
Një tjetër ndryshim i rëndësishëm ka të bëjë me transplantimin e organeve. Vendet anëtare vendosën të zgjasin afatin për zbatimin e rregullave të reja nga 24 në 36 muaj, duke u dhënë institucioneve më shumë kohë për t’u përshtatur me kërkesat e reja.
Megjithëse shumica e shteteve mbështetën kompromisin, diskutimet nxorën në pah dilemat mes nxitjes së inovacionit dhe ruajtjes së standardeve të larta të sigurisë. Disa vende theksuan nevojën për mbrojtjen e të dhënave personale, ruajtjen e kontrollit kombëtar mbi sistemet e transplantimit dhe garantimin e mbrojtjes etike.
Miratimi i pozicionit të përbashkët hap rrugën për negociatat me Parlamentin Evropian, i cili po shqyrton aktualisht dosjen përmes komisioneve për Shëndetësi dhe Mjedis.
Me përfundimin e presidencës qipriote të Këshillit të BE-së, Irlanda do të marrë drejtimin e negociatave në fazën e ardhshme të procesit legjislativ.