Fëmijët që ushqehen ekskluzivisht me gji gjatë gjashtë muajve të parë të jetës kanë më pak gjasa të shfaqin simptoma të çrregullimit të deficitit të vëmendjes dhe hiperaktivitetit (ADHD), sipas një studimi të ri të realizuar nga studiues të Universitetit të Bergenit në Norvegji.
Hulumtimi analizoi të dhënat e më shumë se 37 mijë fëmijëve të lindur në Norvegji ndërmjet viteve 1999 dhe 2009. Studiuesit ndoqën mënyrën e ushqyerjes së tyre në foshnjëri dhe vlerësuan simptomat e ADHD-së në moshën tre, pesë dhe tetë vjeç, shkruan Euronews Health përcjell Gazeta Shneta.
Rezultatet treguan se sa më gjatë që një fëmijë ushqehej ekskluzivisht me gji – deri në gjashtë muaj – aq më i ulët ishte niveli i simptomave të ADHD-së gjatë fëmijërisë.
Sipas autores kryesore të studimit, psikiatres dhe studiueses Berit Skretting Solberg nga Departamenti i Biomjekësisë në Universitetin e Bergenit, çrregullimet psikiatrike ndikohen si nga faktorët gjenetikë ashtu edhe nga ata mjedisorë.
“Ne zbuluam se sa më gjatë të ushqehej një fëmijë ekskluzivisht me gji, deri në gjashtë muaj, aq më i ulët ishte niveli i simptomave të ADHD-së në moshën tre, pesë dhe tetë vjeç,” tha Solberg.
Studiuesit vunë re se edhe ushqyerja me gji në përgjithësi shoqërohej me më pak simptoma të ADHD-së, por efekti ishte më i madh kur foshnjat ushqeheshin vetëm me qumësht gjiri dhe për një periudhë më të gjatë.
Analiza tregoi gjithashtu se lidhja ishte më e theksuar tek vajzat, të cilat shfaqën përfitimet më të mëdha në të gjitha grupmoshat e studiuara.
ADHD është një çrregullim neurozhvillimor që karakterizohet nga vështirësi në përqendrim, hiperaktivitet dhe impulsivitet. Ai diagnostikohet zakonisht në fëmijëri dhe trajtohet me terapi të sjelljes, medikamente ose kombinim të të dyjave.
Sipas studiuesve, qumështi i gjirit mund të ndikojë në zhvillimin e trurit falë përbërjes së tij të pasur me proteina, yndyrna, vitamina, prebiotikë, probiotikë dhe faktorë të tjerë biologjikisht aktivë që mbështesin zhvillimin neurologjik në muajt e parë të jetës.
Organizata Botërore e Shëndetësisë (OBSH) dhe UNICEF rekomandojnë që foshnjat të ushqehen ekskluzivisht me gji gjatë gjashtë muajve të parë të jetës, pa ushqime apo lëngje të tjera, përfshirë edhe ujin.
Megjithatë, autorët theksojnë se studimi është vëzhgues dhe nuk provon se ushqyerja me gji është shkaku i drejtpërdrejtë i uljes së simptomave të ADHD-së. Ata nënvizojnë se nevojiten studime të tjera për të kuptuar më mirë mekanizmat biologjikë që qëndrojnë pas kësaj lidhjeje.
Ekspertët shtojnë se jo të gjitha gratë mund të ushqejnë me gji për arsye shëndetësore ose sociale. Në raste të tilla, formulat e posaçme për foshnja mbeten alternativa e rekomanduar për ushqyerjen gjatë vitit të parë të jetës.