Drejtoresha e Klinikës së Nefrologjisë në QKUK, Dr. Mimoza Berbatovci Ukimeraj, ka njoftuar se ka dhënë dorëheqje nga kjo pozitë pas pesë vitesh në detyrë.
Ajo tha se vendimi erdhi për shkak të mungesës së bashkëpunimit institucional me drejtuesit e ShSKUK-së dhe QKUK-së, si dhe presioneve të vazhdueshme që, sipas saj, kanë cenuar pavarësinë profesionale dhe kanë pamundësuar ushtrimin normal të detyrës, transmeton Gazeta Shneta.
“Ky vendim vjen pas një periudhe të gjatë përpjekjesh për të ushtruar detyrën me profesionalizëm, integritet dhe transparencë, në rrethana të karakterizuara nga mungesa e bashkëpunimit institucional me strukturat udhëheqëse të SHSKUK-së dhe QKUK-së dhe nga presionet e vazhdueshme që kanë cenuar pavarësinë time profesionale si dhe kanë pamundësuar ushtrimin normal të përgjegjësive që burojnë nga kjo pozitë”, ka shkruar Berbatovci Ukimeraj.
Në bilancin e punës së saj, ajo veçoi funksionalizimin e Qendrës së Hemodializës në Rahovec, nisjen e shërbimit të hemodializës në Podujevë, fillimin e matjes së barnave imunosupresive për pacientët e transplantuar, si dhe nisjen e shërbimit të plazmaferezës terapeutike.
Ajo përmendi edhe furnizimin e Klinikës me aparatura të reja të hemodializës, ndërsa tha se gjatë mandatit të saj është avancuar edhe projekti për ndërtimin e objektit të ri të Klinikës së Nefrologjisë me Hemato-Onkologji.
Sipas saj, disa projekte kanë mbetur në fazën përfundimtare ose në pritje të realizimit, përfshirë fillimin e biopsisë renale, funksionalizimin e mikroskopit për sedimentin urinar, renovimin e Shërbimit të Hemodializës dhe pranimin e aparatit PrisMax Flex. /Gazeta Shneta/