Një test i ri gjaku i mbështetur nga inteligjenca artificiale, i cili po provohet në kuadër të Shërbimit Kombëtar Shëndetësor të Britanisë (NHS), mund t’i kursejë mijëra gra nga ekzaminimet invazive dhe të dhimbshme për dyshimin e kancerit të mitrës.
Çdo vit në Angli, rreth 90 mijë gra pas menopauzës referohen nga mjekët familjar për hetime të mëtejshme për shkak të gjakderdhjeve jonormale, një simptomë që mund të sinjalizojë kancerin e mitrës, i njohur edhe si kanceri endometrial. Megjithatë, vetëm rreth 10 mijë prej tyre diagnostikohen me këtë sëmundje, ndërsa afërsisht 2.700 humbin jetën çdo vit, shkruan The Guardian transmeton Gazeta Shneta.
Testi ‘PinPoint’, i zhvilluar nga kompania britanike ‘PinPoint Data Science’, analizon 30 biomarkues në gjak përmes algoritmeve të mësimit makinerik, duke vlerësuar rrezikun e zhvillimit të kancerit. Në një studim me mbi 16.400 pacientë, ai arriti saktësi prej 99% në identifikimin dhe përjashtimin e kancereve gjinekologjike.
Sipas studiuesve, testi mund të shmangë nevojën për ekografi transvaginale te rreth një në pesë gra të referuara, ose afërsisht 18 mijë paciente çdo vit. Aktualisht, pothuajse të gjitha gratë me dyshim për kancer i nënshtrohen kësaj procedure, e cila shpesh është e pakëndshme ose e dhimbshme, ndërsa në raste të caktuara nevojiten edhe biopsi apo histeroskopi.
Mjekët besojnë se përdorimi i testit do të përshpejtojë diagnostikimin, do të ulë numrin e procedurave të panevojshme dhe do të shkurtojë listat e pritjes, duke u mundësuar pacienteve me kancer të marrin trajtim më të hershëm.
Organizata Kërkimore mbi Kancerin në Mbretërinë e Bashkuar e cilësoi testin si premtues, por theksoi se nevojiten studime të mëtejshme për të konfirmuar përfitimet e tij afatgjata për pacientet dhe sistemin shëndetësor. /Gazeta Shneta/