Nëna e fëmijës së parë në shtetin e Austrisë për këtë vit i takonte fesë myslimane. Kjo ka bërë që ndaj vogëlushes Asel të vijnë shumë komente ofenduese dhe raciste nga qytetarë të shumtë në rrjete sociale.
Asel, vajza e parë për këtë vit, është pritur me një valë deklaratash raciste, urrejtje dhe fyerjesh të llojeve të ndryshme për shkak se prindërit e saj i takonin religjionit mysliman.
Në fotografinë në spital, të publikuar fillimisht nga mediat austriake, Asel mbahet në krahë nga e ëma, e cila është e mbuluar. Në profilet zyrtare rrjetet sociale të mediave lokale janë shfaqur komente raciste të shumta të mbushura me urrejtje.
“Shpresoj që të vdesë në djep”, shkruan një person në komentin e tij në Facebook.
“Deportojeni menjëherë këtë feçe”, është një tjetër koment, i cili raportohet nga media amerikane New York Times. Madje në komente, vogëlushja Asel akuzohet se është një “terroriste e ardhshme”.
Shoqatat që veprojnë për mbrojtjen e emigrantëve dhe refugjatëve dhe për të drejtat në internet thonë se nuk kanë parë kurrë një gjë të tillë.
Mes habisë dhe shqetësimit, operatorët që punojnë me emigrantët e huaj komentojnë mbi valën e urrejtjes drejtuar një të porsalinduri në Austri, vend i cili udhëhiqet nga një qeveri e pa balancuar që anon nga e djathta ekstreme.
Ndërkohë, sekretari i përgjithshëm i filialit vienez të Karitasit, Klaus Shvertner bëri apel në Facebook për mesazhe mbështetje për vogëlushen Asel.
Kjo thirrje e tij është shpërndarë nga më shumë se 10 mijë persona./Gazeta Express/