Bordi Drejtues i SHSKUK-së ka miratuar sot Rregulloren për Organizimin e brendshëm dhe sistematizimin e vendeve të punës me anë të së cilës janë përcaktuar edhe koeficientët për zyrtarët e administratës.
Bordi Drejtues i Shërbimit Spitalor Klinik dhe Universitar i Kosovës ka mbajtur sot mbledhjen e 48-të ku janë marr dy vendime, është miratuar Rregullorja për Organizimin e Brendshëm dhe sistematizimin e vendeve të punës, si dhe është marr vendimi për angazhimin e një eksperti të jashtëm për Bordin, shkruan Gazeta Shneta.
Para se të hidhej në votim kjo Rregullore, fjalën e ka marr anëtari i Bordit Dren Boshnjaku i cili në mbledhjen paraprake kishte propozuar që në këtë dokument të përfshihej edhe pozita e Drejtorit për Shkencë. Por kjo ishte kundërshtuar nga kryesuesi i Bordit Naim Bardiqi.
Boshnjaku në këtë mbledhje u tërhoq nga ky propozim, ndonëse tha se vazhdon të mendoj se kjo pozitë është është e domosdoshme që të jetë pjesë e kësaj rregullore. “Por në anën tjetër duke pasur parasysh rregullimin e administratës mendoj që duhet të shtyhet përpara ky proces dhe gjatë rrugës të shikohen mundësitë për draftimin e kësaj çështje”, ka deklaruar Boshnjaku.
Bardiqi në anën tjetër ka thënë se ka qenë kundër këtij propozimi që sipas tij do të duhej të bëhej gjatë draftimit të saj. Ai ka thënë se rregullorja është e bazuar në statutin e SHSKUK-së dhe synon të rris efikasitetin e të punësuarve duke përfaqësuar qartë përgjegjësitë e tyre.
“Kjo do të kontribuonte në ngritjen e cilësisë së shërbimeve për të gjithë qytetarët”, ka deklaruar Bardiqi.
Pas fjalës së tij Rregullorja është hedhur në votim ku ka marr votat unanime të të gjithë anëtarëve.
Në këtë rregullore janë përcaktuar organogrami i SHSKUK-së dhe lista e koeficientëve për zyrtarët e administratës. /Gazeta Shneta/