Cistet ovariane janë qeska të mbushura me lëng që formohen në vezore dhe hasen shpesh tek gratë, përfshirë edhe gjatë shtatzënisë. Në shumicën e rasteve ato janë të padëmshme dhe nuk kërkojnë trajtim, përveç situatave kur rriten shumë ose shkaktojnë shqetësime si dhimbje në legen, marrëdhënie të dhimbshme apo probleme me funksionin e zorrëve.
Sipas të dhënave të publikuara nga Baby Center, këto formacione zakonisht monitorohen dhe rrallëherë paraqesin rrezik serioz.
Tek gratë shtatzëna dallohen dy kategori kryesore të cisteve.
Cistet funksionale janë më të zakonshme dhe lidhen me ciklin menstrual. Ato shpesh janë të vogla, zakonisht nën 5 centimetra, dhe zhduken vetë pa ndikuar tek nëna apo foshnja. Në anën tjetër qëndrojnë cistet patologjike, të cilat krijohen nga rritje jonormale qelizore. Këto janë më të rralla dhe vetëm një në një mijë raste mund të jetë malinje.
Në fillim të shtatzënisë mund të shfaqen edhe lloje të tjera cistesh. Endometriomat lidhen me endometriozën dhe shpesh zvogëlohen gjatë shtatzënisë, megjithëse mund të ndikojnë në fertilitetin e ardhshëm. Cistet theca lutein zakonisht lidhen me trajtimet e fertilitetit dhe formohen si pasojë e niveleve të larta të hormonit hCG.
Vetëm në raste të rralla një cist mund të rritet, të këputet apo të shkaktojë komplikime. Nëse kërkohet ndërhyrje, mjekët zakonisht presin tremujorin e dytë për të shmangur rrezikun e abortit.
Megjithatë, pjesa më e madhe e cisteve mbeten beninje dhe kalojnë pa pasoja gjatë shtatzënisë. /Gazeta Shneta/