Një studim i më shumë se 58,000 grave gjatë një periudhe 12-vjeçare zbuloi se ciklet më të gjata ose më të shkurtra menstruale shoqëroheshin me një rrezik më të lartë të zhvillimit të sëmundjeve kardiovaskulare, sulmit në zemër ose fibrilacionit atrial, sipas një studimi të ri të botuar në revistën “Journal of the American Heart Association”.
Kohëzgjatja e rregullt e ciklit menstrual, e përcaktuar si gjatësia e ciklit nga 22 deri në 34 ditë, gjatë gjithë jetës riprodhuese të një gruaje pasqyron funksionimin normal të sistemeve të lidhura hormonale midis hipotalamusit, gjëndrrës së hipofizës dhe vezoreve dhe është një tregues jetik i shëndetit të përgjithshëm, shkruan Health Day përcjell Gazeta Shneta.
Hulumtimet e mëparshme kanë zbuluar se ciklet e çrregullta menstruale janë të lidhura ndjeshëm me faktorë të shumtë të rrezikut për sëmundjet e zemrës, duke përfshirë rezistencën ndaj insulinës, kolesterolin e lartë, presionin e lartë të gjakut, inflamacionin kronik dhe sindromën ovariane policistike.
Studime të tjera kanë zbuluar se gratë janë në rrezik më të lartë për aritmi, ose rrahje të çrregullta të zemrës, për shkak të luhatjeve hormonale të ciklit menstrual.
“Lidhja midis karakteristikave të ciklit menstrual dhe rezultateve të pafavorshme kardiovaskulare mbetet e paqartë,” tha autori Dr. Huijie Zhang, mjek kryesor dhe profesor në Spitalin Nanfang të Universitetit Mjekësor Jugor në Kinë.
“Duke marrë parasysh prevalencën në rritje të sëmundjeve të zemrës – me 45% të grave në vendet perëndimore të prekura – dhe vdekshmërinë e lidhur, ekziston nevoja për të eksploruar këta faktorë rreziku.”
Studiuesit analizuan të dhënat nga Biobank në Mbretërinë e Bashkuar për të hetuar nëse gjatësia e ciklit menstrual, e cila ishte vetë-raportuar, ishte e lidhur me sëmundjet e përgjithshme të zemrës dhe ngjarjet specifike kardiovaskulare tek gratë.
Ky studim përfshiu të dhëna shëndetësore për 58,056 gra me një moshë mesatare 46 vjeç në fillim të periudhës së studimit, si dhe pa sëmundje kardiovaskulare.
Gjatë një periudhe mesatare të ndjekjes prej 12 vjetësh, u vunë re më shumë se 1600 ngjarje kardiovaskulare midis pjesëmarrësve, duke përfshirë sëmundjen koronare të zemrës, sulmin në zemër, fibrilacionin atrial, goditjen në tru ose dështimin e zemrës. /Gazeta Shneta/