Ministri i Shëndetësisë Armend Zemaj dhe drejtori i Institutit Kombëtar të Shëndetit Publik Naser Ramdani janë shfaqur mjaft kontradiktor me njëri-tjetrin brenda pak ditësh.
Zemaj dhe Ramdani kanë mbajtur një konferencë për media më datën 6 qershor në Ministrinë e Shëndetësisë, ku drejtori i IKSHPK-së kishte deklaruar se kanë teste të mjaftueshme për të testuar të gjithë qytetarët e Kosovës që kanë nevojë.
“Instituti Kombëtar është i furnizuar mjaftueshëm me teste dhe po bëjmë teste në bazë të indikacioneve dhe asnjë qytetarë i Kosovës nuk do të mbetet pa u testuar. Në momentin që do të mbesim pa teste do të kërkojmë furnizim”, ka deklaruar Ramadani.
Por vetëm pesë ditë më vonë, sot më 11 qershor, ministri Zemaj ka dhënë një deklaratë krejt kontradiktore. Ai ka deklaruar në seancën e Kuvendit se ka mungesë të testeve.
“Informacioni i saktë nga IKSHPK është se kemi mungesë enorme të testeve dhe kjo është shqetësuese”, ka deklaruar Zemaj.
Ministri e Shëndetësisë më datën 6 maj kishte nënshkruar një kontratë kornizë me kompaninë “Interlab” për furnizimin e IKSHPK-së me mbi 10 mijë kite. Ndërkaq sot IKSHPK ka pranuar një donacion me rreth 15 mijë kite për testim nga biznesmenë shqiptarë në diasporë. /Gazeta Shneta/