Depresioni pas lindjes është një gjendje që mund të shfaqet në forma të ndryshme tek nënat e reja. Hulumtimet tregojnë se prek rreth 1 në 7 gra gjatë vitit të parë pas lindjes. Në rastet më të rënda, shpesh mbetet i pazbuluar dhe i patrajtuar.
Ndryshimet e humorit janë pjesë normale e jetës dhe pas lindjes priren të jenë më të theksuara për shkak të ndryshimeve hormonale dhe përshtatjes së trupit. Në ditët e para mund të përjetoni trishtim, të qara të shpeshta ose irritim, të njohura si “baby blues”, të cilat zakonisht kalojnë pas pak ditësh.
Megjithatë, lindja e një fëmije sjell ndryshime të mëdha në stilin e jetesës. Është normale të ndiheni të mbingarkuara, të rraskapitura dhe përkohësisht të paafta për t’u angazhuar në shoqëri apo hobi.
Privimi nga gjumi, rikuperimi fizik dhe shpesh edhe anemia nga mungesa e hekurit mund të rrisin lodhjen dhe mungesën e energjisë.
Edhe pse këto ndjenja mund të jenë të zakonshme, ka një pikë ku ato shndërrohen në shenjë paralajmëruese.
Nëse përjetoni mosinteresim të vazhdueshëm, ndjeni se çdo ditë është një barrë e rëndë, dhe nuk e shihni të ardhmen me shpresë si më parë, mund të bëhet fjalë për depresion pas lindjes.
Në këto raste, është thelbësore të kërkoni ndihmë profesionale.
Mbështetja nga ofruesit e kujdesit shëndetësor mund të bëjë ndryshimin mes një rikuperimi të shpejtë dhe përkeqësimit të gjendjes emocionale. /Gazeta Shneta/