Foshnjat e palindura kanë grimca të ndotjes së ajrit në mushkëritë e tyre në zhvillim dhe organet e tjera vitale që në tremujorin e parë, ka zbuluar një studim i ri.
Shkencëtarët në Universitetin Aberdeen të Mbretërisë së Bashkuar dhe Universitetin Hasselt të Belgjikës, studiuan nanogrimcat e ndotjes së ajrit, të quajtura karboni i zi ose grimcat e blozës – për të parë nëse ato mund të arrijnë tek fetusi, shkruan Medical Xpress përcjell Gazeta Shneta.
Gjetjet e publikuara në revistën ‘The Lancet Planetary Health’ tregojnë se foshnjat e porsalindura dhe placenta e tyre janë të ekspozuar ndaj nanogrimcave të zeza të karbonit të ndotjes së ajrit në proporcion me ekspozimin e nënës.
Këto nanogrimca kalojnë gjithashtu placentën e fetusit në mitër që në tremujorin e parë të shtatzënisë dhe futen në organet e tij në zhvillim, duke përfshirë mëlçinë, mushkëritë dhe trurin.
Karboni i zi është një blozë e lëshuar në ajër nga motorët me djegie të brendshme, termocentralet me qymyr dhe burime të tjera që djegin lëndë djegëse fosile. Mes tjerash është një komponent kryesor i grimcave të cilat janë ndotëse të ajrit.
Mekanizmat me të cilët këto grimca shumë të vogla (nanogrimca) shkaktojnë probleme të njohura shëndetësore nuk kuptohen mirë, edhe pse pjesërisht vinë për shkak të kimikateve me të cilat ato janë të veshura gjatë djegies.
Profesor Tim Nawrot tha se: “Ne e dimë se ekspozimi ndaj ndotjes së ajrit gjatë shtatzënisë ka qenë i lidhur me lindjen e vdekur të foshnjës, lindjen e parakohshme ose dhe foshnjat me peshë të ulët me pasoja që vazhdojnë gjatë gjithë jetës.”
“Ne tregojmë në këtë studim se numri i grimcave të zeza të karbonit që futen te nëna kalojnë proporcionalisht në placentë dhe tek foshnja. Kjo do të thotë se rregullimi i cilësisë së ajrit duhet ta njohë këtë transferim gjatë shtatzënisë dhe të veprohet tanimë për të mbrojtur fazat më të ndjeshme të zhvillimit njerëzor”. /Gazeta Shneta/