Gjinekologu Agron Hoxha në një intervistë për Gazetën Shneta, ka treguar se cilat gra shtatzëna hyjnë në kategorinë e pacienteve të rrezikuara për të lindur fëmijë me anomali, si dhe kur iu rekomandohet atyre që të bëjnë testin NIFTY plus.
Testi NIFTY plus mundëson detektimin e këtyre anomalive qysh në javët e hershme të shtatzënisë, përmes një analize të gjakut të nënës.
Gjinekologu Dr. Agron Hoxha thotë se NIFTY plus paraqet një procedurë skriningu ose detektimi prenatal, jo invaziv, të anomalive të mundshme gjenetike-kromozomale, me theks të veçantë Trisomitë tek fryti në gratë shtatzëna prej nga edhe rrjedhë shkurtesa NIFTY (Non-Invasive Fetal Trisomy test).
“Pikërisht, procedura e tillë jo invazive paraqet përparësi kundrejt procedurave tjera invazive siç janë: Amniocenteza, Biopsia e chorion frondosum që ndryshe njihet si Chorionic villus sampling – CVS e që për nga invaziteti i këtyre metodave përcillen me shkalle risku 1-2% të aborteve. Edhe pse si të tilla (invazive) nuk përjashtohen në raste të veçanta indikative ose për të konfirmuar rezultatin abnormal të testit jo invaziv prenatal”, ka shpjeguar gjinekologu Hoxha.
Mjeku tregon se testi NIFTY në bazë të protokolleve shkencore rekomandohet në disa situata indikative, siç janë:
– Kur të dhënat e gjetura ultrasonografike tek fryti indikojnë risk të rritur për aneuploidi, që vizualizohen me transulencë të rritur nukale ( NT – Nuchal Tranculency), mungesë ose hipoplazi të ashtit nazal ( Absent or Hypolpastic Nasal Bone), Ductus venosus abnormal, regurgitimi eventual në nivel të valvules trikuspidale si dhe markeret tjerë ultrasonografik që njihen në literaturë që bashkëshoqërojnë anomalitë gjenetike dhe të gjitha këto të realizuara nga EKO-ja e trimestrit të parë kur fryti ka gjatësi – CRL: 45-84mm, si dhe kur të gjitha këto të gjetura ultrasonografike dhe nga të dhënat e vlerave të markereve të gjakut të shtatzënës siç janë: Free Beta hCG (human chorionic gonadotropin) dhe PAPP-A ( Pregnancy associated plasma protein A) e që rezultojnë me risk të lartë ( High risk) atëherë rekomandohet NIFTY.
– Në rastet kur ka kundër indikacione për testime invazive gjenetike siç janë: Placenta previa, rreziku për abort ose infeksioni me hepatit B.
– Rekomandohet tek gratë shtatzëna mbi moshën 35 vjeçare, e që llogaritet se bëjnë pjesë në grupin e grave shtatzëna me mundësi të shtuar të zhvillimit të anomalive gjenetike të frytit.
– Nga historia paraprake personale e shtatzënës ose familjarë të saj me anomali gjenetike.
“NIFTY testi realizohet nga java e 10-të e barres, kur tanimë qelizat fetale të njohura si Cell- free DNA fragments gjenden në nivel solid në gjakun maternal, pra të gruas shtatzënë dhe janë të mjaftueshme për evaluim gjenetik”, ka deklaruar tutje gjinekologu Hoxha.
Ai ka treguar Trisomitë që detektohen me anë të NIFTY: Trisomia 21- Sindoma Down, Trisomia 18- sindroma Edwards, Trisomia 13- Sindroma Patatu. Por, me zgjerimin e fushës së hulumtimit, sipas mjekut, mundësohet edhe detektimi i trisomive te tjera ( T9, T16, T22) , Aneuploiditë e kromozomeve seksuale( Turner, Klinefelter etj), Delecionet/ Duplikacionet të shumta.
Gjinekologu Hoxha thotë se duke pasur parasysh saktësinë dhe sigurinë mbi 99% të këtij testi nga java e 10-të e barrës, të dhëna këto të konfirmuara nga literatura lidhur me saktësinë dhe sigurinë e këtij testi, e bëjnë akoma më shumë të besueshëm dhe indikativ bërjen e këtij testi, sidomos, që paraqet një test jo invaziv prenatal lehtë të realizueshëm pa asnje rrezik, i besueshem dh i sakt, për gratë shtatzëna aty ku ka indikacione.
Gjinekologu thotë se para se të rekomandohet testi Nifty duhet pas parasyshë një komunikim i drejt me pacienten rreth kësaj procedure.
“Testi NIFTY nuk është test rutinor. Realizohet në rastet indikative të sipershënura, sidomos pas të gjeturave ultrasonografike me risk të shtuar në kuadër të skriningut ultrasonografik që realizohet në javën e 12 ose 13 të shtatzënisë. Gjithnjë, duhet pasur parasysh komunikimin e drejtë me gruan shtatzënë rreth kësaj procedure hulumtuese, dhënien e informatave që përbën ky test si dhe gatishmërinë e profesionistit shëndetësor në pyetjet evenetuale shtesë të shtatzënës për këtë qëllim, duke respektuar të drejtat personale rreth qasjes që ka shtatzëna për këtë test në aspektin: personal, etik, religjioz ose tjetër”, ka deklaruar në fund gjinekologu Dr. Agron Hoxha.
Për të mësuar më shumë për testin Nifty KLIKONI KËTU.