Instituti Kombëtar i Shëndetësisë Publike të Kosovës (IKShPK) ka njoftuar se nga 16 deri më 30 prill 2026 janë konfirmuar tetë raste të fruthit në vend, ndërsa dy raste të tjera janë në dyshim.
Sipas njoftimit, të gjitha rastet e konfirmuara janë fëmijë të pavaksinuar me vaksinën MMR (kundër fruthit, shytave dhe rubellës) dhe po trajtohen në spital, çka tregon për rrezikun e komplikimeve që mund të shkaktojë sëmundja, transmeton Gazeta Shneta.
IKShPK paralajmëron për rrezikun e përhapjes së mëtejshme, duke pasur parasysh natyrën shumë ngjitëse të fruthit, dhe u bën thirrje prindërve që të kontrollojnë statusin e vaksinimit të fëmijëve dhe t’i vaksinojnë në qendrat e mjekësisë familjare.
Instituti rekomandon gjithashtu shmangien e kontakteve me persona që shfaqin simptoma si temperaturë e lartë, skuqje në lëkurë, kollë apo rrufë. Personat me shenja të dyshimta duhet të paraqiten menjëherë në institucionet shëndetësore.
Autoritetet shëndetësore janë duke monitoruar situatën dhe kanë ndërmarrë masa në terren, përfshirë identifikimin e fëmijëve të pavaksinuar, kontaktimin e prindërve dhe angazhimin e ekipeve mobile për vaksinim në komunitet.
IKShPK thekson se vaksinimi mbetet mënyra më efektive për parandalimin e fruthit dhe apelon për bashkëpunim të qytetarëve për mbrojtjen e shëndetit publik. /Gazeta Shneta/