UD. Drejtori i Spitalit Rajonal në Ferizaj, Isa Berisha, ka dhënë dorëheqje nga kjo pozitë.
Sipas tij, arsyet e dorëheqjes së tij janë personale.
“Kam pranuar të emërohem gjatë asaj kohe sa ka qenë konkursi për këtë pozitë (për drejtor të përgjithshëm) që mos me mbet spitali pa drejtor përndryshe arsyet e dorëheqjes janë krejtësisht personale”, sqaroi Berisha për Gazetën Shneta.
Në vend të Berishës është emruar si UD drejtor, Selajdin Sallahu.
Lajmin për emërimin e Kardiologut e kanë bërë të ditur edhe nga Shërbimi Spitalor Klinik Universitar i Kosovës.
“Ushtruesja e detyrës së drejtorit të përgjithshëm të Shërbimit Spitalor Klinik dhe Universitar të Kosovës, Pranvera Zejnullahu- Raçi, ka aprovuar dorëheqjen e Dr. Isa Berisha, i cili ka ushtruar detyrën e drejtorit të Përgjithshëm të Spitalit të Ferizajt”, thuhet në njoftim.
Drejtoresha e ShSKUK-së, e ka falënderuar Berishën për kontributin e dhënë gjatë këtyre muajve sa ka qenë UD drejtor në Spitalin Publike në Ferizaj ndërsa Sallahut i ka ofruar përkrahje.
Brenda një viti në këtë spital janë ndërruar tre UD drejtor.
Pas përfundimit të mandatit të Jeton Zeqirit, si drejtor ekzekutiv, Spitali Rajonal në Ferizaj është menaxhuar vetëm nga UD drejtor.
Fillimisht UD drejtor ishte emëruar Halit Gërbeshi, i cili disa muaj më vonë është suspenduar nga puna për shkak të keqpërdorimit të detyrës zyrtare. Në vend të tij erdhi përsëri si UD drejtor, Isa Berisha, ndërsa tani pritet të emërohet si UD drejtor, Selajdin Sallahu.
Gjashtë muaj më parë ishte anuluar konkursi për drejtor në këtë spital. Në atë konkursi kandidatë për të fituar garën ishin, ish drejtori, Jeton Zeqiri, Fitim Goga dhe Riza Idrizi, mirëpo konkursi u anulua dhe nuk është rishpallur më. Arsyet e anulimit të konkursit asnjëherë nuk janë bërë publike nga Bordi i ShSKUK-së. /Gazeta Shneta/
Selajdin Sallahu emrohet UD drejtor në Spitalin e Përgjithshëm në Ferizaj