Ministri i Shëndetësisë Uran Ismaili ka njoftuar se është bërë draftimi i udhëzimit administrativ i cili pritet të ndalojë fryrjen e çmimeve të barnave.
“Shumë afër një prej reformave më të mëdha në shëndetësinë tonë. Tashmë e kemi draftin final të udhëzimit administrativ për rregullimin dhe unifikimin e çmimit të barnave në të gjitha barnatoret tona. Shteti nuk do të blejë më barna më shtrenjtë se vendet e rajonit, kurse qytetarët do të blejnë barnat e njëjta me çmime të njëjta në të gjitha barnatoret e Kosovës”, ka shkruar Ismaili në Facebook.
Ai po konsideron se ky dokument do të hap një faqe të re për shëndetësinë në Kosovë si dhe do të mbrojë buxhetin e shtetit dhe qytetarëve.
“Ky dokument do të hapë një faqe të re për shëndetësinë kosovare dhe do t’i mbrojë shtetin dhe qytetarët nga shpenzimet e larta financiare. Për këtë, sot pata edhe një takim me drejtues të Autoritetit të Konkurrencës dhe Odën e Farmacistëve të Kosovës. Kemi punuar shumë gjatë dhe me kujdes duke analizuar të gjitha faktet e mundshme, që mund të kenë ndikim në jetën e qytetarëve për atë se çka sjell zbatimi i tij. Falënderoj përgjegjësit e Autoritetit të Konkurrencës për angazhimin e tyre dhe përfshirjen në këtë proces kaq të rëndësishëm për vendin”, ka shkruar Ismaili. /Gazeta Shneta/