Qysh kur ndërprisni kontraceptivët deri në javën e 12-të të shtatzënisë duhet të merrni acid folik shtesë.
Acidi folik, i quajtur edhe folat ose folacin është një nga vitaminat B, që bën pjesë tek lëndët e rëndësishme ushqyese i cili parandalon defektet e tubit nervor si spina bifida ose anencefalia.
Tubi nervor, prej të cilit formohet shtylla kurrizore e foshnjës zhvillohet shumë shpejt mbas ngjizjes madje ndoshta përpara se ta kuptoni që keni ngelur shtatzënë.
Pa acid folik të mjaftueshëm, tubi nervor mund të mos arrijë të ngjitet plotësisht përgjatë gjithë gjatësisë duke lënë të zbuluar palcën kurrizore dhe duke shkaktuar një sëmundje të njohur si spina bifida.
Foshnjat me anencefali vdesin shpejt pas lindjes, pasi u mungon një pjesë e madhe e trurit.
Burimet e acidit folik:
Studimet tregojnë se po të merret acid folik shtesë, mund të parandalohet deri në 70 për qind të rasteve me spina bifida.
Burim i mirë natyror ushqimor i acidit folik janë perimet me gjethe të gjelbërta të errëta si spinaqi, brokoli, pastaj agrumet, bishtajat si fasulet, qiqrat.
Për të mësuar më shumë rreth komplikimeve të shtatzënisë KLIKO KËTU.
Po ashtu, embrioni i grurit, majaja dhe e verdha e vezës janë burime tjera të pasura me acid folik.
Gjithsesi nuk duhet të vareni vetëm në burime ushqimore. Për të qenë të sigurta, me të ndërprerë kontraceptivët, duhet të filloni të merrni acid folik shtesë.
Tabletat me multivitamina shpesh përmbajnë acid folik, por jo aq sa për të mbrojtur foshnjën.
Për të ulur rrezikun e sëmundjes spina bifida, duhet të merrni çdo ditë nga një tablet 400 mikrogramësh acid folik deri në javën e dymbëdhjetë të shtatzanisë.
Tabletat mund të blihen pa recetë në çdo farmaci.
Nëse keni pasur edhe më parë, fëmijë me defekte të tubit nervor, atëherë rreziku për të pasur një fëmijë të dytë me këtë defekt është më i lartë.
Në këtë rast, mjeku do t’ju këshillojë të merrni çdo ditë një dozë më të lartë me acid folik (5 miligramë). /Gazeta Shneta/